期指結算後，港股即破位而落，2萬大關失守，恒指收市19724，大跌374點，期指亦低水101點，大市短期將下試50日線（19462）同今年6月徘徊區頂部支持，徘徊區高低位在19160同17600，跌得越深，支持力越強。
噚日尾市又有「奇景」，已經係58分，合生創展（754）仲成緊11個幾，但失驚無神有人係咁插，最低落到10元，但59分又掃番上11.40元收市。另外，福山能源（639）亦一樣，55分時仲造緊5.30元，58分就插到落5元，跟住59分又掃番上5.27元。股東睇唔到，當然唔知有咁「震驚」嘅場面，唔識驚，若睇住佢咁樣跌法，真係會心臟病發。
講到大上大落，近期好多股仔急升後都趁機會伸手抽水，但配股後，股價又多數大幅回落，大同集團（544）係其一，抽完水後，股價有如坐滑梯，落到噚日嘅4.1仙，呢個係去年6月至今年6月的大圓底頂部支持位水平，應該有一守之力。大同市值只有2億元，有「細細粒」概念，有心人既可以弄低，第日亦一樣可以挾到飛起。
鄭州燃氣（3928）業績理想，近日股價由14元急升上16.72元才出現調整，噚日收15.72元，跌0.42元，成交只24.3萬股，沽壓唔大，調整後應有力再上。
09年（12月年結）的上半年，鄭燃營業額6.15億元人民幣（下同），升17.1%，毛利2.1億元，升27.3%；股東應佔溢利1.15億元，升32%，每股盈利0.92元，升31.7%，不派中期息。
毛利率上升
公司主要在鄭州經營天然氣業務，上半年業績理想，主要是天然氣銷售收入及燃氣管道接駁及建設收入有增長，住宅及商業用氣今年3月起漲價，令天然氣銷售毛利率由去年同期13.78%上升到18.02%，整體毛利率由31.44%上升到34.19%。
截至09年6月底止，公司共有住宅用戶8.26萬戶，比08年底增4.86萬戶；商業用戶2139戶，增123戶；工業用戶增1戶至67戶；以及車輛用戶增1178輛至9394輛。鄭燃母公司鄭州燃氣集團與華潤燃氣集團合作，未來發展前景更為有利。
09年全年，估計鄭燃盈利2.5億元，每股盈利2元，約2.26港元，PE只約7倍，頗為吸引，冷門股可小注持有，中線目標20元。
郭兆誠