波司登（3998）主席高德康靠羽絨服起家，仲靠住成功打造中國自有品牌，獲國家領導人接見，咪話唔巴閉。而且高總生財門路多，佢私人持有嘅波司登控股集團，投資非羽絨生意，業務包括房地產同基建。
波司登集團由高總長子高曉東打骰，擔任執行董事兼總經理。噚日小高總來港，為集團揼本4億人仔、明年第三季啟業嘅山東德州富豪康博酒店，搵富豪國際（078）幫手管理。小高總介紹集團現有千幾二千畝地，遍佈國內多個省分，家仲處於成長期，未有咁快打算上市喎。
山東酒店搵富豪國際管理
喺外國浸過鹹水嘅小高總，家陣喺上市公司冇職銜，佢解釋自己覺得羽絨服業務已經有好多專家，反而波司登控股集團更具挑戰性。華華計落，搞地產變巨富比較易，小高總擇善而闖事業應該係明智決定。