自從幾齣由前輩級演員孭飛嘅劇集叫好叫座後，無綫近年開拍劇集嘅趨勢都鍾意搵一班資深有經驗嘅藝員做主角，之前有《溏心風暴》，又有黎耀祥、鄧萃雯同商天娥擔正嘅《巾幗梟雄》。話時話，家觀眾嘅口味都趨向睇實力派，所以無綫新劇《翻叮一族》都搵嚟一班資深演員包括夏雨、商天娥等助陣。
夏雨、許紹雄、伍詠薇、商天娥、梁靖琪（Toby）同楊思琦等噚日到將軍澳為《翻》劇試造型，由於劇集環繞茶餐廳所發生嘅事，所以佢哋喺現場冲奶茶，但就雞手鴨腳。
Toby做第三者喊寃
對於再次喺劇集孭飛嘅夏雨，噚日接受電話訪問時話唔會特別有壓力，佢話相信公司係配合唔同劇組先搵唔同年紀嘅演員，佢都唔會特別要求跟同輩或後輩做對手，佢話：「後生有後生嘅方法，自己冇乜所謂，同輩就有默契啲，但同後生都會擦出火花。」
扮演夏雨囡囡嘅Toby會同陳鍵鋒及敖嘉年有對手戲，對於被指介入黃宗澤同胡杏兒嘅感情，Toby呼寃話：「唔係事實唔回應，大家傳我同敖嘉年啦，成日都話我係第三者。」伍姑娘劇中會同夏雨發展曖昧關係，仲被稱為「窩輪天后」，簡稱「輪后」，佢笑住話個名都幾難聽。