網上散步時，看過類似問題：你出第一份糧時，會選擇進貢那個名牌？答案是，約有一半人投票給Prada。請不要看輕網民間的小型選舉，某程度上確是反映了時裝名牌在大眾心目中的「信心指數」。衫字經09FW開季第一炮，由兩個時裝界均具信心的名字：黃偉文（Wyman）和黎堅惠（Winifred），講男講女講Prada。
記者︰吳美美
攝影︰梁細權、黃子偉
黑色窩釘長褸$25,650、黑色皮革襯衫$11,550、黑色窩釘連皮革長褲$17,500、黑色窩釘鞋$8,900
Prada牌攪拌機
先由Prada男裝講起。Prada是時裝界中，少數極有本事每季都讓人不禁「嘩！」一聲（甚至幾聲）的品牌。於是，找一個不易送出「嘩！」一聲的人來說Prada原來甚艱難，所以邀來一個自問頗難取悅的消費者——Wyman，是最適合的人選。
記=記者
Y=Wyman（黃偉文）
Y︰「我覺得阿姐行緊運啦！呢幾年無論男裝女裝都好似唔使嘥力，撩幾筆就已經做咗個又靚又好容易着嘅Collection。今季這個窩釘系列都係其中一個行緊運嘅系列，我個人基本上嚟講，一有窩釘就坐底有60分底分。但其實窩釘都流行咗好多年，亦有很多人做過，要做一啲我未見過嘅嘢亦都唔容易。我自己都是一個幾難取悅的消費者，因為年資都有咁上下耐，但呢個系列最吸引我亦最有趣嘅地方，就係用窩釘釘喺一啲傳統西裝嘅衣料上面，而唔係我哋平時想像到嘅皮料或軍褸質地。即係用一啲Punk嘅衫，與傳統男裝嘅西服，放入攪拌機，攪混咗就出咗呢批衫。」
記︰窩釘不是未見過的設計，Prada又點樣改良運用呢？
Y︰「窩釘有一個問題，就係好多時為咗靚要付出沉重嘅代價。好多時候着窩釘衫，行15分鐘街，你膊頭已經梗晒，因為呢啲都係好重嘅衫，係會墜得好緊要，而難得地呢批衫嘅着感係好好。你望到窩釘釘得好密，你凝住係有15磅，但其實好輕，你唔知佢做咗咩手腳，令到件衫望落有好多窩釘，得到閃及重量感，但與此同時着上身又真係唔重。因為我成日去旅行，就會諗有邊件褸可以去到旅行又靚又舒服又輕，呢件就可以考慮帶上機，平時嘅窩釘衫就多數唔係幾得嘞！」
黑色無領皮革長褸$38,500、黑色皮革襯衫$11,550、黑色長褲$5,800、黑色窩釘鞋$8,900
再攪拌皮與針織
記︰今次你示範的四套衫之中，有三件都是長褸，是否意味今季Prada男裝長褸特別出色？
Y︰「其實長褸無試過唔興，不過我睇天橋相及實物嘅時候，特別得我心都係幾件長褸，解釋唔到點解，亦唔代表我鍾意呢幾件長褸就係佢流行，亦唔係佢流行所以我鍾意，而係咁啱合眼緣嗰幾件都係長褸。我記憶中有一件無領長褸，前面係一啲兔毛，都係一件好精采嘅設計」
記︰看天橋相及看實物時，Must-buy-itemsList前後有否改變？
Y︰「只有更Must-buy，因為啲窩釘好吸引，但我真係擔心重死我，到後來見到實物，真係着起嘅時候，OK飄嘅，所以反而更想買。另一點係呢個Collection用咗一個好重要嘅主題，就係用咗好多皮加針織，呢兩種物料放埋一齊，好多時前幅係皮後幅係針織，今次你會發現好少針織衫上面會用咁大塊皮，你會覺得設計師係用盡皮嘅彈性，當着喺一個人身上嘅時候，會有種好得意嘅彈性效果，唔知點形容，你哋都係試吓着吓啦。其實亦都好少人用皮去設計一啲過頭笠嘅衫，Prada今次做得幾成功。」
黑色長褸$22,650、黑色孖襟外套$14,450、黑色長褲$5,800、黑色VitelloLux手提袋$18,900
推介一定買釘鞋
記︰傳說中，Prada是一個後生仔女出糧時的必買名牌頭三甲，看過今季後，你覺得這個傳說會否延續？
Y︰「每個人第一次出糧買名牌，都等於新人獎，一生人一次，所以好難講。例如我自己第一次出糧，Prada都仲未趕得切出男裝。而我印象最深刻係九十年代的Prada，潮流界勁飆升嘅時候，一聽到出男裝係第一時間要買嘅。因為當時佢哋用尼龍做袋好出名，將成件事搬去做衫變得好吸引。同埋當時佢係做緊一啲好基本好紮實嘅時裝，一啲都唔Fancy，係好功能性做得好Fine嘅衫。我記得當年係要同朱祖兒喺舖頭度爭衫，而我就爭輸咗……」
記︰傷心事就唔好再提，不如提議讀者今季Prada男裝應該入手的Items。
Y︰「我諗係各人喜好啦，但係我諗最平易近人，大部份人都接受到而又有少少唔同嘅嘢，應該係呢個Collection幾對有窩釘嘅鞋，任何一個男仔都可以享受到。即係譬如話有啲人唔鍾意着長褸唔鍾意周身都係皮，有啲人覺得周身窩釘閃得滯嘅，之但係有一對正正經經嘅皮鞋，又有一啲窩釘喺上面，有啲亮點，我覺得會喺穩陣之中帶一點趣味，我覺得呢樣幾老幼咸宜。」
記︰看過你在專欄裏提及，愛買入女裝設計，那麼今季Prada女裝有何心水？
Y︰「其實我未有好多時間去睇晒啲實物，所以就答唔到你嘅問題嘞！」
記︰可否推介一下你愛去瀏覽的時裝網站？
Y︰「呢條問題似係啲人知道我成日去東京，無論係私人傾偈或者做訪問嘅時候都叫我介紹一啲隱世之店，或者係神秘私伙嘅Shoplist。但係呢個世界已經係資訊好發達嘅世界，其實我行嘅舖頭同你行嘅舖頭係一樣，無乜嘢係我搵到而你搵唔到。我諗網站都係一樣，我甚至相信好多人喺網上散步嘅時間比我多好多，所以我覺得佢哋搵到嘅比我Bookmark嘅更有趣。所以每次遇到呢啲問題嘅時候，我會有興趣不如你介紹番畀我，我哋可以交換USB，睇吓大家Bookmark有咩唔同。」
黑色西裝褸$13,200、白色窩釘領恤衫$4,900、黑色西褲$4,550
Prada09FWReady-to-wear
