內地股市似乎真係跌到煞唔到掣，上證綜指昨瀉6.7%，收2799，8月份以來累計下挫21.8%，創下15年來第二大單月跌幅，沽壓相當沉重。
港股昨無法獨善其身，失守2萬點，希望9月份內地股市爭氣，港股在19000以上完成調整，否則相當麻煩。
調整浪中入市炒作係高難度動作，不過，唔少散戶已習慣日日入市炒作，無論個市升定跌都會搵股來炒，星俠亦係其中之一。現時入市注碼要因應市況調低，升市時可以勇啲，但跌市時最好保守啲，否則好難長期在股市立足。
伺機短炒一轉
最近表現不俗的新海能源（342）引入新股東，可擴大業務範圍，受消息刺激，上周四曾急升至0.77元，創52周高位，其後跟隨大市調整。
昨跌至10日線0.67元即有買盤頂住，最後僅微跌1格，收0.70元，陰陽燭現錘頭。大市只要回穩，估計該股仍有後着，伺機入市短炒一轉，料有力升破前高位0.77元，目標1元，跌穿0.60元止蝕。
方星俠