學《算死草》戲入面嘅陳夢吉話齋，佢責罵阿歡時講：「有時啲嘢要襯o架！唔係人哋點你就走去學o架！」我求大俠指嘅，唔係川迪教練麥卡倫喺彌敦道9號剪咗個冬菇頭，而係佢好想學足阿仙奴領隊雲格，但又冇人哋咁型！
俾飛燕諾球迷勁笑
事緣周日川迪喺荷甲作客打和飛燕諾1:1場波，隊員迪奧迪喺58分鐘攞咗面黃牌，但係麥卡倫就覺得球證判得好離譜，於是走入場理論一番。呢啲環境通常都係教練輸o架啦，最後呢位前英格蘭領隊就俾球證判罰離場。
麥卡倫當時梗係唔順超啦，可能佢腦裏即時諗起，阿仙奴上周六大戰曼聯一役，雲格被趕離場時都係死唔肯走，仲行埋上奧脫福嘅觀眾席諗住睇埋場波先算。今次麥卡倫就有樣學樣，學足雲格咁賴死唔走，又係跟風行上去看台，點知俾班飛燕諾球迷笑到面都黃，最後麥卡倫都要俾球證送走，入返球員通道。
講真，我求大俠冇話大細超嘅，不過雲格嗰嘢行上觀眾席插住褲袋，跟住雙手再攤開疑似同球證講：「咁仲唔叫離咗場呀？」現年59歲身高1米93嘅雲格，人哋起碼頭髮濃密，企喺度同球證撐嗰陣，有晒台型；但睇番麥卡倫出名係肥仔嘜，塊面經常紅到成個關公咁兼頭髮稀疏，我求大俠奉勸你唔好學啦，有時啲嘢要襯o架！
聽講雲格單嘢仲有新聞跟，呢位阿仙奴領隊已解釋踢水樽只係因為失望，並唔係投訴誤判越位。家陣有傳球證甸恩會向雲格道歉，因為根本毋須激到要完場前30秒趕佢出場。嗱，麥卡倫，呢啲咪叫有型囉！我睇你今次學人哋唔肯離場，後果未必會好似雲格咁，有個好位畀你落台喎。
講開又講，費Sir賽前仲少有地讚雲格，但雲格周一出言諷刺紅魔，話對手踢法醜陋：「喺我立場去睇，佢哋只係諗住點樣向對手犯規，根本唔係踢緊波；曼聯呢啲打法完全違反踢足球嘅意義，仲衰過『插水』！」