打電話搵財經記者K撲料，點知佢講兩句就收線：「喂，左丁山，最好下星期一（八月三十一日）至打電話嚟，呢兩日好唔得閒，其實成個禮拜都做到死！」記者K唔肯傾耐啲，唯有搵大編輯，大編輯話：「今日係八月二十六日，你搵人真係不合時宜，你上網睇吓就知，今日好多好多記者招待會呀。」經佢一提，立即醒起上星期係「超級業績宣佈期」，單係八月二十六日就有三十幾間公司宣佈業績，報紙財經版做到失魂，財經電台都冇法子講得晒，單係大公司就有中信泰富、中海油、思捷環球、合和、九倉、光大控股、嘉里建設……記者會於兩點後就有中信泰富、大酒店、貿發局、合和、中海油、嘉里，仲失驚無神整多個任志剛記者招待會，難為啲財經記者在金鐘與中環之間撲嚟撲去，報紙精簡人手之後，實在窮於應付。
唔怪得某公司企業傳訊經理T小姐與公關靚女E猛咁呻：「昨日call記者好辛苦，家好驚，記者會如果冇乜人嚟，場面冷落，老闆會詐晒型o架。」如果老闆係李國寶就得啦，有佢坐響度，記者包保踴躍出席，可惜咁有傳媒號召力嘅老闆，百中無一呢。
又或者係任志剛總裁，係香港千中無一之記者磁石，一聲話見傳媒，電視台即刻安排直播，甚麼公關call記者喎，完全慳番，財經版夠膽唔派人嚟咩？任總裁臨別秋波，記者會上談笑風生，應付裕如，真能人也，聽佢答記者就精彩嘞，可惜電視機旁嘅觀眾聽唔到現場記者嘅問題，收音甚曳，與長和系主席李嘉誠之記者會有好大分別，嗰一日，《蘋果》記者問將軍澳樓盤，所有電視觀眾都清楚聽到記者問乜嘢嘅，如此看來，金管局公關下次為陳德霖開一個上任記者會，唔該處理好啲，擺多啲咪，搞好現場收音得唔得？
任總做金管局總裁凡十六年，任期之長，僅次於格林斯潘做聯儲局主席十九年，點都夠皮啦，可稱無憾矣，伯南克做聯儲局主席未必會做得咁耐o架。任總雖然年過六十，超逾政府之法定退休年齡，仍然精神煥發，比李察基爾更有吸引力，大可再尋職業第二春，最佳出路會係做香港大學之經濟金融學院兼職教授，回饋母校，唔會介意教授薪水低啩？（與佢退休前薪酬比較）