新任社會福利署署長聶德權貴為「三耳署長」,當然要多啲落區耳聽八方。佢鐵定今個星期二展開落區之旅,去各區區議會同區議員先禮後兵,首站將會現身由行會成員兼鄉議局主席劉皇發掌控嘅屯門區。
唔少新官上場,最先拜會嘅都係屯門區,事關要畀面有新界王之稱嘅發叔,等佢叫班鄉紳以後幫幫忙。三耳署長除咗秉承呢個傳統,原來仲額外打聲招呼,上任之初已經率先打電話畀發叔,自我介紹新仔上場多多包涵。呢招確實令三耳署長多咗重保護罩,事關同三耳署長冇乜交情嘅發叔聽到個電話後,都似乎幾冧,覺得呢位新丁都幾尊重佢老人家。三耳署長後日落到屯門區,睇怕都會有人射住啦。