一年多前宣佈患上腦血管瘤而離職嘅馬時亨，由原先嘅肥馬變為fit馬，一年間減咗成18磅，腰圍由38吋減到33吋半，令唔少女性非常羨慕。肥馬噚日喺商台節目分享近況，話日日運動兼戒食甜品，身形fit咗，但個血管瘤就情況依舊，冇好過亦冇變差，家陣佢會盡量避免壓力，防止腦中風。
叫為官者忌擺官威
早前因為正生事件喺空氣中落淚嘅肥馬，話嗰次係佢第四次落淚。第一次係佢24歲時，調去紐約做嘢，日日俾上司鬧，有次忍唔住匿埋靜靜雞大喊一場。第二次係20幾年前媽媽過身，佢自然悲痛莫名。
至於第三次流馬尿，就係早兩年舅父、即係藝人曾志偉嘅父親曾啟榮擺大壽。自小靠舅父接濟嘅肥馬諗起，自己多年來因為官職在身，冇乜去台灣探舅父，好難過，忍唔住喺舅父91歲壽宴中淚灑當場。曾啟榮當年係警署警長，被廉署調查，去咗台灣，廉署76年發出通緝令至今。
講番退休後嘅肥馬，佢噚日唔肯評論官員表現，只稱為官者要以唔敷衍兼唔做騷嘅心態做事，更切忌擺官威，仲話佢喺商界時，都受過一啲官員嘅官威，唔知係講邊個呢？
mailto:[email protected]