明天就踏入9月份，9月係一個多事嘅月份，01年有911事件，舊年嘅9月15號就有百年老號雷曼兄弟申請破產。雷曼事件除咗掀起金融海嘯，更令一班唔能夠承受高風險嘅投資者，發現自己個portfolio裏面，原來有名叫「迷你債券」嘅結構性產品。
仲有15日就係雷曼破產一周年，香港嘅雷曼迷債苦主，上過街、示過威，的確可以迫使到部份金融機構就範，賠錢平息風波。講開賠錢息事寧人，前幾日敏妮同位CFP師姐食晏，講開銀行又再大量招聘個人理財顧問，之前因為金融海嘯，搞到無人讀嘅金融學、經濟學同CFP，嚟緊應該又受歡迎。
其實好多人都知，銀行為業績要賣產品，銀行前線員工唔少要孭quota，至於投資者亦都唔見得對自己嘅投資負責任，所以唔知自己買乜，只係想知自己可以賺幾多。不過一場金融海嘯，令呢班投資者學精咗，自創一套安全投資法。
購多人買產品
聽師姐講，自從迷債事件，有幾家金融機構為咗息事寧人，願意賠錢同啲客和解，一班「精明」投資者就學精咗點樣揀投資產品。佢哋唔會再好似以前咁，淨係問隻產品有幾多厘回報，係咪保本，穩唔穩陣，反而首先會問，隻產品多唔多人買？
咁樣問嘅原因，唔係想知隻產品係咪好受市場歡迎，而係要知，隻產品出事時，多唔多苦主一齊上街，夠唔夠群眾壓力可以逼政府做嘢！
聽完之後敏妮拍手叫絕，亦倒抽一口凉氣。同時為銷售呢啲產品嘅金融機構，同香港國際金融中心嘅地位擔心，試諗諗，商業社會買賣雙方有一紙合約為憑，買賣細則條款都有白紙黑字寫明，但金融機構為咗彌補銷售手法失誤作出嘅補償，反而鼓勵個別投資者以群眾壓力保護自己權益，而唔係循正途透過增加自己嘅投資知識，保障自己，真係嗚呼哀哉！
溫敏妮