中移動（941）董事長王建宙（圖）喺台灣留咗成個禮拜，上周五離開前最後一站，係去近年賣Netbook賣到開晒巷嘅華碩拜會。華碩董事長施崇棠話，華碩趁呢次面對面會談，將華碩具創新嘅產品完整介紹畀王總。
王總睇好電子書
施總話呢次會晤，希望將華碩嘅創新精神同經營理念同對方分享，又介紹華碩嘅創新產品，包括小型筆記本型電腦EeePC、電子書，及中移動喺內地嘅3G制式TD-SCDMA相關產品。施總形容呢次係難得嘅「高層與高層之間理念創新執着的交流」，佢仲話王建宙對華碩展示嘅創新產品相當驚艷。
施總又話，目前華碩嘅EeePC，已經同中移動嘅3G服務拍住進行銷售，施總仲話「目前賣得很好！」至於王總睇好嘅電子書，施總話由於電子紙比液晶面板更方便閱讀，所以認為電子書將會比掌上裝置喺閱讀上更有優勢。