【一夜賭城戀大咗之郎來了】本報日前獨家披露楊千嬅與丁子高已於本月11日在美國拉斯維加斯秘密註冊結婚，昨日新婚的千嬅首度公開承認已婚，更透露答應嫁給丁子高，是因為她在美國扭傷頸後，丁子高承諾要陪她一起度過下半生，所以她感動得漏夜與男友去註冊，戴上婚戒一刻，她開心得熱淚盈眶。
楊千嬅與丁子高拍拖兩年半，日前突然被踢爆已在美國註冊結婚，全城嘩然，昨日她在尖沙嘴文化中心出席港台太陽計劃活動時，港台特別安排工作人員為她撐紅傘兼送上鮮花，同場歌手陳奕迅、譚詠麟和容祖兒等也紛紛上前恭賀新娘子，千嬅的歌迷更拉起寫了「永遠支持楊千嬅丁太」的橫額撐偶像，逗得她笑逐顏開。
笑言不慣被叫丁太
昨日成為全場焦點的千嬅，笑言要多謝劉德華引發其婚訊被揭，因為開心事她也不打算隱瞞。對於被記者改稱為丁太，她一臉甜絲絲地說：「你哋都係叫番楊小姐好啲，我對丁太呢個稱呼唔係咁慣，而且我同佢仲係分開住番自己屋企，結婚返嚟後，一切都未有改變，我諗等出年過埋大禮，補擺喜酒後，先會有真正嫁人嘅感覺。」
問千嬅是否奉子成婚？她笑說：「我以前做護士o架，梗係唔會啦！今次去美國結婚係玩即興，完全符合我飛女正傳嘅性格，有一晚同佢走去玩Mummy（環球影城的室內過山車）呢個機動遊戲時唔小心扭傷頸，跟住佢同我講：『千嬅，你曾經講過，過咗30歲就係進入人生倒數階段，大家應該更加珍惜對方，我可唔可以陪你走埋落去。』呢一刻我好感動，即刻答應下嫁，諗唔到佢即刻拉住我開車去賭城註冊，嗰時已經係凌晨1點半，因為太急，我哋喺嗰邊係咁易入珠寶店買戒指，點知我隻戒指太大，佢嗰隻就太緊，所以唔係咁啱戴，不過佢幫我戴上戒指嗰一刻，我都忍唔住喊咗出嚟。」
昨日千嬅向傳媒發放在賭城行禮時的結婚照，相中丁子高穿西裝，千嬅則穿了一條綠色裙，雖然打扮隨意，但新郎為新娘戴上戒指一刻，明顯可見丁子高緊張得耳朵通紅，新娘則眼泛淚光，一對新人都表現得十分開心，而現場則只有丁子高的表哥到場觀禮。
回港即往拜會奶奶
千嬅結婚後，立刻將婚訊告知雙方父母和東亞娛樂老闆林建岳，千嬅父母一直憂心女兒婚事，如今女兒終於出嫁，兩人也老懷大慰。千嬅又透露回港後已第一時間拜會奶奶，對於隱瞞已婚，她說：「好對唔住大家，我結婚冇即時同大家分享，其實我唔係有心要隱瞞，只不過因為我同東亞仲有合約，嚟緊要拍戲、出唱片同明年開演唱會，咁多工作喺身，我點都要尊重林生。我原本打算等出年做晒手頭上工作，定咗擺酒日子就會公告天下，但諗唔到結婚只係10幾日，我連結婚證書都未收到，記者已經爆咗出嚟，證書唔知係咪寄錯咗去報館度呢？」
暫無意退出娛樂圈
問千嬅喜歡丁子高甚麼？她笑言：「佢心地善良，對我同屋企人都好好，我唔開心時佢會畀好多正能量我，係佢令到我有結婚嘅感覺，記得上年2月我生日佢同我去韓國旅行，幫我搞驚喜派對，仲跪喺度同我求婚，佢喊得好厲害呀！當時我雖然冇答應，但我哋已經有計劃要結婚。同佢拍拖後，我哋互相影響，我發覺佢好有幽默感。」對於舊愛鄭中基恭喜她結婚，千嬅說：「希望佢都可以快啲成家啦！」
婚後千嬅打算繼續在娛樂圈工作，對於生兒育女的事，她說：「生仔唔使咁急，仲有時間，我仲想做吓娛樂圈。」昨日千嬅出席完太陽計劃活動後，與公司高層到灣仔君悅酒店開會，至7時許便乘車回赤柱寓所休息。
採訪：馬建華 攝影：陳慧安
小八卦：岳少旗下一門三喜
曉格蘭特（HughGrant）有一套《四個婚禮一個葬禮》（FourWeddingsandaFuneral），港版變奏為一個葬禮三個婚禮，而且三宗喜訊均出自東亞旗下，十分巧合。始作俑者劉德華因缺席外父喪禮被抨擊，與朱麗倩上演世紀拖手後仍不認已婚，結果本報從內華達州克拉克縣一個公共搜尋網中，找到兩人的結婚註冊文件。
搜尋引擎也同時令東亞旗下的楊千嬅和黎明婚訊浮面，「黎樂戀」去年3月已傳出開花結果，且由老闆林建岳出手拆彈，驚喜不大；倒是楊千嬅與丁子高結婚不足20日即被踢爆，認真大整蠱，加上這一對向來不被看好，故消息一出儼如原子彈爆發，頓成全城焦點，令連日來備受抨擊的劉德華有機會稍稍回氣。烈女千嬅以個人幸福勇救劉德華，喜事當頭加上看在同門份上，不如就當賣個人情吧。
一網講盡：網友狂轟大話傑青
曾先後獲選十大傑青的劉德華、黎明和楊千嬅連環被踢爆已婚，轟動全城，也令一班死忠fans終於認清藝人等於偽人的真面目，多個討論區更有不少網民狂插三人大話連篇。
bigmouth2006：打倒三大說謊傑青。
VenusWilliams：楊小姐真係假到連自己都呃埋。
kongkong7794：講真，真係有啲失望呀，如果大大方方咁公開可能呢種失望會冇，但家原來發現個個都係大話精。
rainbow09：點解要隱瞞呢？公開咗，大家都會戥佢哋開心，家篤爆咗講大話，俾人話大話天王，真係捉蟲。
cnewkguyf：應該改一改：劉華失守，殃及千嬅！黎明既來，偽人現形！
資料來源：各大討論區
專家話：公開婚姻狀況未侵私隱
美國內華達州克拉克縣這個對香港人來說非常陌生的搜尋網： http://recorder.co.clark.nv.us/oncorewebecommerce/Search.aspx，一舉戳破劉德華、黎明及楊千嬅的未婚謊言。其實該網頁除可搜尋婚姻狀況紀錄外，還列明在當地持有之物業及刑事紀錄，換言之只需輸入人名，即可輕易將任何人大起底。
其實該網頁的作用是防止重婚，同時於物業買賣及聘用員工時為雙方提供保障。至於是否涉侵犯私隱，梁永鏗律師昨日表示香港也有不同機構提供上述資料供公眾查閱，不過只限於針對性用途，如涉官司、物業交易及結婚等。
梁永鏗說：「美國比較開放，用網頁披露個人資料唔會俾人告，所以就算香港人想禁止，應該都做唔到任何嘢，除非佢去美國打官司，成為案例，咁先有啲機會。」
各位讀者找到藝人在賭城結婚的資料，歡迎電郵mailto:[email protected]報料，薄酬。
