根據世界醫療組織調查報告，全球約有5億人有精神病，以目前全球人口有60幾億計，即係差唔多12個人就有1個有精神病；如果用呢個平均數嚟講，即係AC米蘭上周六晚嘅米蘭打吡中有份上陣嘅14位球員（連後備），就至少有1個有精神病，我求大俠有理由相信嗰個係加度素，青山醫院唔該預個床位畀佢。
意甲第2周就上演米蘭打吡，AC「名義」主場對國際米蘭；AC開賽初段係威係勢，柏圖同朗拿甸奴先後失機；踢到20幾分鐘，今場做隊長嘅加度素整傷左足踝，不過佢紮住繼續踢，夠晒熱血。
出場口噏噏掉臂章
不過國米先由一次靚組織，由莫達29分鐘先開紀錄，之後伊度奧一次單刀，加度素腳傷纏身唔夠快，就只好用手拉跌呢隻獵豹，球證就梗畀12碼，同畀張黃牌呢位狂人。「大米」36分鐘射入，國米領先到2:0，加度素似乎「病情」發作，原本佢都不斷向場邊示意腳傷頂唔順要換人，不過後備嘅施多夫鬼咁漏氣，又換衫又換鞋，搞成幾分鐘都未入替，加度素嬲嬲吓就自動申請出場，中圈飛鏟剛由皇馬加盟國米嘅史奈達，當係意甲見面禮，跟手球證就畀多張黃牌加度素，兩黃一紅被逐。出場之際加度素仲口噏噏，又將隊長臂章掉落地，好似躁狂症發作咁，人人都怕咗佢。
李帥買閘唔使旨意
AC打少個自然崩潰，國米再由馬爾干同史坦高域各入一粒，4:0大勝對手。AC教練李安納度賽後就唔敢再搞加度素：「事件發生喺不幸時間入面，加度素一直負傷比賽，我都準備用施多夫入替佢，佢都係盡責任防守啫。」其實呢場波暴露咗AC防線，尤其兩閘速度唔夠嘅問題，李安納度賽後話希望收購兩閘球員，不過想問貝盧斯科尼攞錢？李安納度都係儍儍哋o架嘞！
加度素事後證實因足踝傷要休息兩周，連意大利國家隊都退出埋，對AC係好事定壞事呢？