【一夜賭城戀大咗之情迷大話王】本報連環爆出劉德華、楊千嬅與黎明分別與另一半在美國賭城註冊結婚，去年3月9日已迎娶女友樂基兒的黎明，昨日在中環鬧市繼續為電影《火龍》開工，雖然未肯就結婚一事回應，但他仍笑笑口打招呼，甚至企定定任fans拍照，明顯心情勁靚。
現年42歲的黎明與29歲名模女友樂基兒（Gaile），拍拖4年以來屢傳婚訊，雖曾否認，原來二人已於去年3月9日於賭城註冊結婚。黎明昨午與任賢齊及葉璇等在中環雪廠街一帶為新片《火龍》開工，吸引過百傳媒和fans圍觀，紛紛拿相機、手機狂影黎明。
收工返愛巢會妻
黎明黐上鬍子及化成受傷模樣，於下午3時許落車試位，見他左手戴上道具結婚戒指，心情不俗。其後返回保母車休息，大批記者一擁而上欲追問他結婚一事，但黎明未有接受訪問，只是笑笑口揮一揮手，然後企定定給記者拍照，至下午6時許拍攝完畢，便乘保母車匆匆趕返上水愛巢會愛妻Gaile。
至於昨日《火龍》拍攝劇情講述黎明欲拯救被劫匪挾持的內地演員王寶強，並與劫匪開槍火併。身為動作導演的錢嘉樂表示會恭喜黎明，並說：「佢結咗婚咁耐都唔覺，不過睇住佢呢年半又真係好開心嘅。」
代言合約冇限制
此外，貴為黎太的Gaile工作依然不絕，日前現身柴灣為法國休閒服Aigle拍攝新一輯廣告照。品牌公關發言人文先生被問到Gaile婚訊會否影響合作關係時說：「完全冇影響，對佢嘅形象咪仲好，我哋好歡迎。」
與Gaile尚有合約的護膚品牌Neutrogena開腔撐Gaile，發言人表示：「我哋合約下年先至約滿，應該唔會有太大影響，喺各方面都係值得恭喜嘅事。」Gaile所屬的Calcarries模特兒公司發言人Joey透露：「Gaile除Neutrogena外，嚟緊仲會有兩張代言合約未出街。」他又表示Gaile所有合約也沒有限制結婚。
此外，黎明的舊情人舒淇，昨午由北京返港，她一見到記者即顯得十分避忌，不停㩒手提電話，記者問她黎明結婚一事睇法，她一概封嘴。
採訪：何永寧、羅慧敏
攝影：李志明、黃偉雄、彭琮然
娛樂資料庫：黎明最叻耍太極
黎明與樂基兒被揭結婚年半，不過由去年3月於馬爾代夫度蜜月返港到近月開騷，他雖曾否認婚訊，但多次借故避談，又使出金句絕技大耍太極，甚至昨日仍對已婚一事封嘴。
08年3月20日
兩人被傳在馬爾代夫秘密結婚，黎明即透過公司否認，返港現身機場時只輕笑謂：「NoComment。」
08年3月29日
已經結婚的黎明在韓國出席活動時，接受當地傳媒訪問否認婚訊：「我們根本沒有結婚，消息傳出時，我跟她確在馬爾代夫旅行。結婚是我跟女友之間的事，其實結婚也只是一紙婚書而已。其他人終日問個不停，更加令我不想結婚。」
08年6月27日
黎明出席公益金活動，談及若結婚會否公告天下，他笑道：「唔一定要結婚先食飯，總之結婚就交返畀黎明自己啦，如果我要結婚，就算要講，㩒都㩒唔住，但我家冇諗呢個問題。」
09年5月19日
黎明在個唱記招被問到婚期，他說：「今年雙春兼閏月，知道好多人結婚，我隻新碟有好多情歌，每個人都有夢想嘅婚禮。」
資料來源：《蘋果》資料室