鷹君集團（041）上個禮拜宣佈，搵咗永隆銀行常務董事兼行政總裁朱琦（圖）出任獨立非執行董事，孖住滙豐大班鄭海泉為鷹君股東服務，年12萬銀嘅董事袍金；另外朱琦身兼鷹君嘅公司審核委員會成員，加多每年15萬銀酬金。之但係，跟鄭大班去年淨袋38萬銀董事袍金相比，仲有啲差距喎。
鷹君主席羅嘉瑞醫生一改近年低調作風，除咗早前為上市公司董事禁售期風波發聲之外，今年5月仲接替賭王之子何猷龍，做埋上市公司商會主席。之不過，上述兩位銀行界有份量人士所屬機構都未係上市公司商會會員，羅醫生似乎要加把勁，踢多啲公司入會，壯一壯商會聲威喎！