上海要發展成中國另一個國際金融中心，滙豐銀行亞太區主席鄭海泉都話，可能喺2020年甚至更早就可達到目標。喺對外進一步開放之前，上海就先提高一眾外資或外國人嘅認受性，其中一個範疇就體現喺上海政府頒發嘅獎項上。
洋人大班膺滬榮譽市民
年僅42歲嘅英國紳士、滙豐中國行長兼行政總裁翁富澤（RichardYorke，圖）就獲得上海市政府授予「榮譽市民」稱號。早於07年9月，Richard已經獲得當地政府頒發「白玉蘭榮譽獎」，今年8月，Richard又成為「榮譽市民」，以表揚佢推動上海金融中心建設、培養當地金融人才、支持上海教育、同埋為社會公益事務作出貢獻。Richard將會趕及喺十．一國慶前獲頒殊榮。而上海同濟大學客席教授KlausToepfer都係同一屆上海「榮譽市民」。
另外，滙豐回歸A股市場嘅計劃如箭在弦，喺內地嘅工作地方都唔多夠用，現時嘅滙豐大廈同埋喺金茂嘅滙豐保險寫字樓，明年就會搬去新落成嘅上海國際金融中心，Richard話，新大樓高55層，滙豐佔咗20層，總樓面差唔多係香港中環總行嘅一半。華華深入了解過，滙豐一對活寶貝獅子將會重新鑄造，重現上海，睇嚟放番喺IFC門口嘅機會都幾大噃。
李華華