上周四晚留在公司，為歐聯抽籤改版，當時娛樂版也為大儍哥去世而更新，大功告成後，看看鐘已是凌晨一時多。近年報紙要與互聯網競爭，一遇大新聞，每每在死線後一改再改，務求每位讀者拿上手的都是「新」聞。若你是在旺角等報紙新鮮出爐的讀者，就肯定會見過版面不斷更新的例子。
慣了在公司做到三更半夜，也慣了在公司幾部電視，now和有線任睇的日子。每到周末，馬會開出近百場賽事，包括日聯/澳職/德甲/意甲/英超等直播比賽，在公司如「一張票，睇到笑」，目不暇給得「睇慾」不振。
乖乖付錢等睇西甲
放工回家，英超已踢了十之八九，剩下的尾場或周中的午夜場，就是最大娛樂。除非如上周一買定麥當勞等半夜3點睇利記，卻看到愛隊主場慘負維拉1:3，失望得整夜難以成眠。
連同未開季的NBA，今季歐洲4大聯賽：英、意、德都已落實直播頻道，剩下的西甲花落誰家，截稿前還未知道。家中一向睇開now，連同上網等費用，每月數百元少不免，若再加上有線，真是小數怕長計。所以季前知道歐聯蟬過別枝，也先忍住不出手，就是先看西甲形勢而定。
「銀河艦隊」挑戰強勢衞冕的巴塞的確吸引，加上西甲開賽時間較晚，大可安坐家中收看。如真的落在有線，還是會乖乖付錢，其中一半月費，就當付給NBA165台吧，半夜看公牛的classicgames，也是不錯的享受。
文：仙道彬
電郵：mailto:[email protected]