律師會會長王桂壎代表律師會反對校園驗毒計劃，主因並非反對政府，其實佢同黃仁龍司長講過，非常支持反吸毒，佢睇過一啲政府數字，知道學生吸毒問題日趨嚴重，政府不能不應付，但係驗毒計劃提及警方可憑驗毒資料，追緝販毒，打擊毒販，律師會期期以為不可。如果一位學生驗毒後被發現吸毒，會否講出向誰人買毒呢？是否向警方和盤托出呢？他日警方拉人，是否需要學生上庭作證呢？少年證人以後會否得到警方保護呢？如果學生與毒販同住於一個公共屋邨內（呢個係香港特殊情況），會否遭受報復呢？
講起嚟，如果要學生上庭作證嘅話，學生一定要事先簽字應允，自願驗毒，自願作證，當然亦同時需要家長簽字。講起法律，問題多多，涉及私隱，聯合國兒童權利公約，以及實際嘅刑事訴訟嘅程序問題，故此王會長話律師會唔出聲唔得。
王會長在中文大學聯合書院畢業，主修歷史，講法律問題冇咁多legalese（法律言辭），幾好傾也。佢話律師會推行一個「師長計劃」，年青律師擔任中學生嘅「學長」，學生有個人問題可向學長傾訴，由學長輔導之，此計劃係律師會嘅志願性工作，反應好好。
有律師做學長輔導，當然係好。但年少學童多數聽同輩說話，受同輩壓力，對成年人嘅說話唔多聽得入耳。大編輯就有一位朋友，屬中產階級，育一女一子，大女讀書生性，入咗大學醫學院，細仔讀到中三就冇乜心機，掛住玩，無心向學，勉強升上中四之後，細仔忽然話要去「百佳超市」做散工賺外快，父母當然極力反對，但細仔邊會聽話吖。原來佢與三位同學商商量量搵散工，啱啱行路經過百佳就走入去應徵做散工，返屋企報告畀父母只係例行公事啫。父母激氣兼冇符，驚住兒子以後更冇心機讀書。點知過咗幾個星期，奇蹟出現，兒子自動話唔想再做散工嘞，以後會努力讀書考大學，父母驚喜之餘，追問點解，兒子和盤托出，做咗百佳散工之後，被逼遵守工作規矩，嚴守規律，工作辛勞，又日日畀啲阿嬸同事教訓：細路，做散工唔做得一世，讀書先至係正路。另外一啲散工又話，呢類工冇前途o架，快啲返學讀書啦。捱過鹹苦之後，兒子迷途知返，父母大喜過望，猛講多謝百佳代佢哋教仔，大編輯聽完為之莞爾。