網民發起嘅「支持泛民五區總辭方案，全民公決2012雙普選」FB組群，至今有超過4,000人加入，噚日呢班網民走出虛擬世界，出咗旺角行人專用區搞論壇，請嚟一班泛民主派人士交代對方案嘅睇法。唔知係咪網民甚少蒲頭搞街頭論壇嘅關係，噚日連掛條論壇橫額都搞咗一大輪，仲要臨時用膠紙封咗橫額上「facebook」一字，以免市民誤會論壇係由facebook主辦。
論壇女主持係長毛fans
噚日蒲頭嘅網民中不乏網上名人，主要搞手要數今年六四期間，喺中聯辦絕食抗議嘅周諾恒，佢噚日主力喺街頭派單張同收集簽名，又解釋畀市民聽咩叫五區總辭變相公投，佢話遲啲會將市民簽名送去泛民各主要政黨總部，反映好多市民支持五區總辭建議。
至於噚日為論壇做女主持嘅「姬川亞弓」，相信高登網民對佢好熟識，噚日姬川亞弓負責準備論壇講者名牌，仲同社民連長毛好啱傾，據講佢係長毛fans，佢自己似乎都有fans，噚日唔少男網民一到場就同佢雞啄唔斷。