本報昨日率先揭發楊千嬅和丁子高，以及劉德華和朱麗倩於美國拉斯維加斯秘密註冊結婚，今日再有黎明與樂基兒已結婚，雖然當事人未有親身承認，但外界紛紛祝福他們，眾人皆認為結婚是人生開心事，不妨向外界坦白承認，共享喜悅。
傅明憲：打去恭喜佢
「曾與丁子高傳緋聞的傅明憲：我會打去恭喜佢（丁子高），我兩個都識，至於同邊個熟啲唔講得唔得，以前我同千嬅都係鄰居，總之佢哋開心就得啦，都係證實咗先啦。」
陳奕迅：唔好畀帖我
「我聽到話千嬅結咗婚，我咪哦一聲，就算係假都恭喜佢，我未親耳聽到，千祈唔好畀帖我，但我有傳sms話congratulations畀佢。」
容祖兒：冲喜吓係好
「好開心，作為讀者睇到覺得係大日子，冲喜吓係好，有情人終成眷屬。我就唔會去拉斯維加斯結婚，香港都可以。華仔做乜要對唔住，我一直都好欣賞佢，愛屋及烏。」
蔡卓妍：唔會玩神秘
「如果係真嘅梗係會祝福佢哋，平時華仔喺我面前冇提及朱麗倩，只講工作。其實私事可以唔使公開。結婚係開心事，如果結婚嘅話我絕對唔會玩神秘，一定公開。」
譚詠麟：可能係貪平
「我唔知，但如果係真梗係好事，至於有傳華仔有個女，我都係啱啱聽到，如果真係結咗當然恭喜佢哋。可能華仔同千嬅都貪嗰邊平，500蚊可以搞掂，或者可能係林生（林建岳）包架機載佢哋過去都唔定。」
羅家英：實轉晒地盤
「我同阿姐（汪明荃）又喺嗰邊結婚，梗係真啦，又合法又簡單香港又承認。咁結婚係好事，但係嚟緊冇人會再喺賭城結婚，知道晒仲唔轉地盤？其實喺美國仲有其他地方都可以咁樣結婚，但我唔會講出嚟。」
李克勤：支持同祝福
「每個愛錫華仔嘅朋友同fans，喺呢個時候應該畀佢空間同體諒佢。每個人心中嘅尺度唔一樣，每個人都有苦衷，我會支持同祝福佢。至於千嬅我更加唔知，同佢唔熟，阿倫就可能知，圈中人個個都關佢事。」
梁漢文：考慮送禮物
「我都係今日睇報紙先知，其實冇話大方定神秘搞結婚，最緊要兩個人有自己諗法，唔係個個似我咁鍾意熱鬧，兩個人嘅事兩個人sweet去處理咪得。確實咗之後會送禮物畀佢，我都要諗吓送乜。」
方力申：咁多都查到
「係我就唔去嗰邊註冊，我去紅棉道，最危險先係最安全地方，反正大家都查外國網。今次都真係惡搞，咁多藝人都查到，冇理由全行想佢哋結婚嘅人都查到，但若果係真，我都替佢哋開心。」
薛凱琪：撞正我生日
「8月11日係好日，嗰日係我生日，如果千嬅真係結婚，咁就梗係戥佢開心，佢哋應該好愛先會結婚。至於華仔，如果係結咗婚梗係開心，都拍咗咁耐拖，呢啲係兩個人嘅事，可能大排筵席時先會同大家講。」
鄭丹瑞：可能係解放
「冇嘢好得過有個家，佢（華仔）同另一半都有默契，聽到佢哋結咗婚都開心，可能對佢係一個解放，其實家嘅人都唔會因為呢啲事唔鍾意個藝人。至於千嬅梗係恭喜佢，喜事重重。」
蘇樺偉：Fans冇異樣
「我知老闆（華仔）結婚，但我唔可以亂講嘢，唔係佢唔畀講，係我尊重佢，我戥佢開心。我未見過朱小姐，但我相信老闆有分寸，總之恭喜佢，佢踏出第一步，而fans都好接受，冇任何異樣。」
