新華製藥（719）業績靚爆鏡，相對A股折讓又大，國企當中，呢家冷灶值得煲煲。新華製藥09年半年度（6月底止），受惠強化管理及採購成本下降，純利飆升近1.4倍到3910萬銀人仔，集團兼喺7月發盈喜，預期今年頭3季度純利增長，可以上到1倍至1.5倍。新華製藥有頭3季靚仔業績，全年度已經坐定粒六。保守計數，新華製藥09年度純利增長1.5倍到7500萬銀人仔，PE由往績32倍，大降到得番13倍水位。又新華製藥最新NAV3.90元，現價2.46元，PB得0.63倍。而場內部份中資藥業股，經年頭升到家陣，一兩倍PB者，視作等閒，講PB吸引力，新華製藥彈出。
再講，新華內地深圳A股（編號：000756）最新造6.49元人仔，兌番港幣係7.37元，香江上市H股相對A股大幅折讓66.6%，A、H股折讓，大到離晒譜。呢轉冷吼新華，博見1倍PB，到3.90元，新華現價潛在回報率講緊翻半番。
港華燃氣睇高幾班
港華燃氣（1083）對上星期尾，啱啱公佈09年半年度（6月底止）業績，純利增長近27%到1.28億銀，經歷後金融海嘯期，集團仲keep住有雙位數增長，已經唔錯。又港華NAV3.20元，現價2.60元，PB0.8倍，場內中資燃氣股平均PB挨近兩倍，港華平好多。港華大股東係四叔系中華煤氣（003），以大股東實力級數，扶持集團內地業務發展，睇高港華幾班。先嚟轉短打，以港華近兩個月橫行區2.42元至2.85元炒上落，上下波幅回報率18%，都有魚有肉。
錢雋