等到頸都長，《狼人外傳》終於推出Blu-ray！身為煲碟發燒友，就算未曾睇過，亦因為電影內有大量追逐打鬥鏡頭，再加埋實景拍攝以及後期CG製作，若然唔當佢係一隻試機天碟，咁真係嘥晒！
記者：陳國輝
Story
金剛不壞之身
自出生以嚟，狼人（曉治積曼飾）手背已長出一雙利爪，並與親生大佬一齊經歷咗二次世界大戰、越戰等重要戰役。但因域陀魔性微露，兩兄弟關係出現極大變化，跟住仲殺死狼人心愛嘅女人！為咗報仇，佢接受改造，讓超能鋼注滿體內，練成金剛不壞之身；同時，結合眾異能於一身嘅改造人WeaponX，亦計劃向佢挑戰。
直升機片段最爆
齣電影係咪由頭打到尾？咁就要大家買隻碟返去慢慢睇啦！但講到最令人想翻煲嘅片段，首選直升機追殺狼人一幕，劇情緊湊，電單車引擎聲，再加埋直升機嘅大炮聲等，槍林彈雨，幾乎「嘭」到阿媽都唔認得；但更正係加插埋狼人用鋼爪爛吉普車嗰一幕，整段追逐戰大概得5分鐘，但感覺已相當震撼。
但隻碟亦有不足處！話到明玩盡聲色效果，點解唔支援DolbyTrueHDAudio？《狼》所用嘅係DTSHD，筆者同日試埋《保衞奇俠》，佢以DolbyTrueHD作輸出，分別都幾大，尤其係低音炮部份更明顯，而Surround表現亦都唔及《保》咁有包圍感。
高清澳洲靚實景
聽完聲、睇畫！《狼》採用全高清1080p輸出，如毛髮、面上嘅斑紋都相當細緻，唔講唔知，大部份劇情仲係用實景拍攝！
除咗一啲你覺得冇可能嘅動作，例如用劍將子彈一分為二，肯定係由CG繪製之外，你可能認為大部份劇情都唔係實景，但如果睇埋製作特輯，會發現其中狼人與銀狐重逢一幕，原來喺新西蘭南島山脈取景。稍欠水準者，係尾段狼人同WeaponX大戰嗰幕CG，冇咁真實而已。
超長Bonus欠中文字幕
買得《狼》碟，大部份只求收藏，或欣賞出色嘅聲畫效果，至於幕後製作花絮、導演專訪等，相信也不感興趣。
至於刪剪片段、從未曝光絕密片段等，大家唔好抱太大期望，只可以講出一個事實：睇Bonus所花嘅時間會好長，但由於唔提供中文字幕，自問英文水準有番咁上下，就不妨慢慢欣賞。
Profile
影碟格式：Blu-ray
畫質輸出：1080p
字幕：中、英
語言：英語（DTSHDMA5.1）、西班牙語、葡萄牙語（杜比數碼5.1）
特別收錄：製作特輯、製片人幕後講評、變種人×秘密武器、刪剪片段、深入狼人世界特輯、從未曝光絕密片段
