兩個女人加上一個男人有過節，手尾真係好長。公民黨司庫容詠嫦去年立法會選舉前，出席陳茂波新書發佈會，被指支持對方參選而唔支持自己友譚香文，事後原來譚香文向黨中央投訴，質疑有人違反黨紀。
雖然譚香文落選後退黨，但事件仍有下文，八方聽聞公民黨進行紀律聆訊後執行家法，裁定容詠嫦「撐」波波不妥，或會損害公民黨形象，要接受書面告誡，至於佢唔支持譚香文，則因各有各說而不成立。容詠嫦不回應事件，強調自己仍積極參與黨務及地區工作，譚香文表示不予置評。
為免日後選舉再出現類似事件，據講公民黨會檢討黨員支持黨外人士參選指引，唔好再為街外人而傷及自己人和氣。