華叔搞社運幾十年，深諳組織群眾運動之道，公民黨日前邀請華叔擔任內部研討會講者，分享心得，華叔化繁為簡，話一個組織要招攬會員壯大發展，一定要考慮供求問題。
佢以教協為例，指教協有大量忠心會員，無非因為滿足到會員要求，其中一個例子係長期優惠價賣餅卡，華叔話唔好輕視呢啲着數嘢，因為真係箍到唔少會員，教協更可能係香港最大餅卡拆家㖭。華叔講供求，公民黨員卻想佢講公投，事關佢提出五區總辭名單震撼泛民陣營，點知德高望重嘅華叔封口，強調只係以普通黨員身份講嘢，唔可以代表民主黨，至於公投可唔可行，留待公民黨同其他泛民主派慢慢傾，老人家多說無益。