小妹呢輪想買部新款數碼儍瓜機，發現部份新機勁sell闊動態範圍（dynamicrange）拍攝模式呢個新功能。小妹唔知呢個功能有乜嘢作用。咪搵咗消委會老友解釋吓。
消委會老友話，最近巿面係多咗啲設有闊動態範圍拍攝功能數碼相機，都幾好用。因為好多時拍友都遇到拍攝嘅景物反差（contrast）好高，即係明暗差別好大。例如相片嘅構圖包括光爆嘅天空，又有陰影部份，影出嚟嘅相，有部份位置曝光過度，或部份位置曝光不足，同樣令相片細節盡失。
一個模式輕鬆影靚相
老友指出，以前用傳統菲林拍攝，菲林寬容度較佳，反差稍強通常都唔成問題，但現今嘅數碼相機普遍應付唔到高反差嘅拍攝環境。有啲專業數碼相機玩家，會用唔同嘅曝光量重複拍攝，將較高同較低曝光量嘅照片，分別記錄低光位或高光位嘅細節，然後再利用電腦軟件將兩張照片合併，張相先有番晒細節。
佢話，要將兩張相併合都幾花工夫，而闊動態範圍拍攝模式，就可以輕輕鬆鬆拍到啲高反差景物嘅靚相。不過，唔同牌子嘅相機，佢哋背後技術並不相同。有啲以高速連續拍兩張唔同曝光嘅照片再自動合併，有啲將感光器上嘅像素分為兩組，以不同靈敏度同時拍攝兩幅照片再合併。作為用家又唔需要理會嘅，最緊要影到張靚相咪得囉。
電郵：mailto:[email protected]