大儍成奎安前晚因鼻咽癌復發病逝浸會醫院，終年54歲。他彌留之際，太太、兒孫、好友曾志偉、張家輝及馬海倫等均在其身旁守候，陪大儍走完最後一程。志偉昨表示大儍最放不低是年僅10歲的細仔，而馬海倫則認為大儍飽受癌魔折磨，現在對他而言可算是一個解脫。
擅演兇神惡煞江湖人物的成奎安，04年證實患上鼻咽癌後，一直奮力跟癌魔搏鬥，月前鼻咽癌復發，他不停進出醫院，並一度盛傳他體重跌至100磅。日前大儍離開養和醫院回家休息，豈料大前日突然發高燒，其家人隨即將他送往浸會醫院醫治，可惜延至昨日凌晨12時，大儍終不敵癌魔，終年54歲。
「佢走時好安詳」
前晚大儍好友譚詠麟（阿倫）、肥媽瑪利亞、曾志偉、張家輝及馬海倫等紛紛趕往醫院見大儍最後一面，而他彌留之際，其家人包括太太、兒孫、志偉、張家輝及馬海倫等均在其身旁守候，陪大儍走完最後一程。
趕赴醫院見大儍最後一面的志偉，昨日收拾心情到將軍澳電視廣播城出席《LaughingGor之變節》宣傳活動，他透露阿倫前晚8時許探望大儍後，致電給他表示大儍的情況未如理想，所以志偉11時許即趕到醫院探望大儍。當時大儍已不是很清醒，志偉說：「我去到醫生已同佢打咗嗎啡針，因為佢20幾個鐘都合唔埋對眼，瞓唔到覺，佢唔捨得走。」他表示上星期大儍仍留醫養和，但大儍的病況已去到承受不了化療同電療，故醫院決定停止療程，而大儍也回家與母親、家人等共享天倫，志偉說：「到前日大儍突然發高燒，所以即時送去浸會醫院。噚晚我同大儍對話唔到，但佢家人叫我同佢傾偈，佢會知我嚟到，佢講唔到嘢，我只係叫佢放心走啦，我知佢放唔低自己10歲嘅仔，當時佢所有屋企人都喺度陪佢，佢走時個樣亦好安詳，唔係瘦到不似人形，仲係好大隻。其實佢今次係因為癌細胞復發移咗去肝臟，個過程好快，唔係令佢好多痛苦，唔會話糾纏幾個月先走，佢情況係急轉直下，只係個幾月時間，上次探佢，佢仲話好有希望，仲話個病唔夠佢鬥。」
耳語籲勿牽掛
有關大儍喪禮安排，志偉表示會尊重其家人決定，但他會以朋友身份協助其家人辦後事。他表示送別大儍後，他便打電話給大儍的朋友報告情況，並致電給佛教朋友為大儍做些儀式來送別。
馬海倫昨日則在電話中說：「我喺佢耳邊叫佢唔好牽掛，個個都好好，佢有感覺，佢彌留之際，個個都好安靜，忍住唔喊，因為如果一喊嘅話佢會走得唔安樂、唔捨得走，所以佢太太喊嗰陣，我哋都有拖開佢叫佢忍住唔好喊。後來大儍個大家姐摸住大儍個頭，喺佢耳邊傾偈，大概11點半左右，大儍就走咗啦，大家都喊得好傷心。大儍一直俾個病折磨，家對佢嚟講係一個解脫。」
南圍村民感難過
大儍是西貢南圍村長，昨日南圍部份村民已得悉其病逝消息，並表示十分可惜。經營村口士多的成先生對大儍病逝也表現得十分難過，他說：「大家就好似兄弟咁由細玩到大，佢前幾日都有返過嚟，家都唔知講乜好。」
採訪、攝影：駱華齡、王崇穎、彭琮然
人物誌：成奎安小檔案
家庭狀況：家有五兄弟，排第四。與母親、妻子、兩子及一名孫兒四代同堂。
出道經過：學歷僅小五程度，輟學後隨兄長到邵氏做機工，曾跑龍套，後李修賢邀之參演電影《公僕》正式入行。
星途：多演惡人或江湖大佬角色，多屬客串，曾在《着牛仔褲的鍾馗》擔正男主角，又分別憑《愛人同志》及《皇家飯》獲提名金獎像最佳男配角。
公職：西貢南圍村長，03年參加香港區議會競選，惜以400多票敗給對手。
大儍部份電影作品
《公僕》（84年）
《皇家飯》（86年）
《監獄風雲》（87年）（左圖）
《霹靂先鋒》（88年）
《愛人同志》（89年）（右圖）
《着牛仔褲的鍾馗》（91年）
《創世記》（電視、99年）
《C+偵探》（07年）
資料來源：《蘋果》資料室
－大儍往事－
五支歌走天涯
成奎安鵝公喉聲大大，肯定不是唱家班，偏偏邀請他登台的人絡繹不絕，03、04年是高峯期，大儍每場收3萬，一星期唱足五日，首本名曲得5隻：《上海灘》、《小李飛刀》、《九百九十九朵玫瑰》、《無言的結局》及《愛拼才會贏》。足迹遍佈全中國，遠至西藏及東北。00年更收起平日的惡形惡相，以一身白衣作天使打扮拍味千拉麪廣告（圖），大收宣傳之效。
曾任舞廳睇場
成奎安年輕時做過舞廳睇場，他曾說：「好多黑社會都係好人嚟o架，好多有錢佬都係黑社會。以前個老闆好鍾意打交，我一日到黑左手拎斧頭右手揸刀，飲大咗就同人爭執。」20歲因為傷人罪入獄4年，那時兒子剛出世。大儍多年前受訪，自認當年試過偷運人蛇，試過一晚賺三、四十萬，他說：「以前我哋屈蛇係替天行道，啲人好慘，冇得食，幫得到就幫，我都要搵命博。」
不滿星爺忘本
大儍由李修賢帶入行，對此一直心存感激，故對於也是修哥帶出身的周星馳在電影《濟公》中直呼說：「李修緣，我殺你全家。」大感不滿，直指星爺忘本。由於大儍不善理財，試過為兩萬元稅四出求人，他憶述道：「有一個，喺呢行算係大哥大，我親自同佢講，你都要搵個人拍戲，我唔係苛求乜嘢，我同你拍兩年戲，價錢幾多任你畀，我只不過差兩萬蚊交稅。佢同我講一句話：『我哋公司係唔借錢嘅。』」最後由張國忠出手解困。
搵失車最拿手
大儍在黑白兩道均人緣甚廣，曾盛傳每有圈中人失車，就會找他幫手，離奇地車主只要肯付一點「手續費」，數小時後失車就完好無缺重現人間，大儍一次受訪時說：「我好多時都會話佢哋（車主）知，有辦法搵番，不過就要畀番少少嘢，唔好打爛人飯碗。」難怪人人失車都第一時間找他。