東亞運動會100日倒數活動及火炬接力傳遞喺今日下晝舉行，大約下晝3點會喺尖沙嘴九龍公園開始傳遞聖火，演藝界代表陳奕迅（Eason）負責喺彌敦道跑第10棒，任賢齊跑第12棒，容祖兒跑第15棒，李克勤喺文化中心跑第41棒，譚詠麟就喺灣仔碼頭跑第54棒。最後一棒、即係第65棒會由風之后李麗珊負責，預計下晝4點半會傳到去灣仔金紫荊廣場。
o靚模有份即跌watt
其實除咗港、台兩地藝人外，仲有內地女歌手朱哲琴同韓國歌手蔡妍傳火炬。不過，當馮仁昭知道連o靚模蔡穎恩（Evelyn）都有份喺日航酒店附近跑第24棒之後，即刻覺得成件事跌晒watt。
另外，無綫方面會喺今日下晝2點45分至4點半進行直播，但聽聞因為技術性問題，藝人方面只能夠播出Eason、容祖兒同阿倫部份，唔似得舊年奧運聖火傳遞咁睇足全場。
此外，Eason嘅全新國語專輯已經完成，為咗配合新碟下月推出，Eason近期頻頻往返港、台兩地，真係忙到飛起。
