公民黨議員陳淑莊原來未去過北京，今年中共建政60年，佢終於獻出第一次，處女北京遊果然有驚喜。陳淑莊同八方講，前晚到國家大劇院聽中央民族樂團音樂會《江山如此多嬌》，國家大劇院建築宏偉，歌劇院可容納2,000幾個觀眾，設備先進齊全，陳淑莊係舞台劇發燒友，正在驚嘆劇院美輪美奐之際，忽然見到好多西裝友神色凝重入場。
陳淑莊見西裝友企定後，初時都不以為意，隔冇耐就見到江澤民夫婦、曾慶紅同劉延東等要人入場，原來佢哋都係當晚音樂會座上客，陳淑莊坐樓上，貴客就坐大堂中央靚位。初次遊京嘅陳淑莊正一大鄉里出城，去齊各觀光點影相，遺憾係時間太少，未能吃盡京城美食。