科大師生噚日為朱經武校長舉行盛大歡送會，"PaulChu,wemissyou!"聲震科大，反映科大人幾咁唔捨得呢位親民校長。學生逼朱校長自爆追求太座陳璞情史，原來兩人在實驗室定情，朱太又話願意下嫁朱經武，係因為自己鍾意食中菜卻唔識睇中文，嫁人後有人識睇餐牌為佢點菜。
歡送會前朱校長舉行任內最後一場講座，有過千人出席，前特首董建華夫婦、前高官羅范、理大校長唐偉章都嚟捧場。朱經武話要向難度挑戰，就係用廣東話發言，一句「唔信蛇（邪）」全場爆笑，後來都係轉回普通話。
朱校長係籌款高手，最自豪係獲已故霍英東捐款八億元，仲要係一炮過；佢又標埋尾會先離任，獲盧家驄慈善基金捐出5,000萬元。朱校長話離任「不帶走一片雲彩」，卻拎走一籮情誼。中大劉遵義同浸大吳清輝都準備退休，兩人同師生關係麻麻哋，歡送會有幾「盛大」，高教界無不翹首以待。