連續劇播兩季都嫌多，偏偏張繼聰與謝安琪這一對，由06年宣佈奉子成婚到現在傳五角緋聞，歷時3年，越傳越像小說。恩愛夫妻被形容為女強男弱，壓力可真不小，誰想到這些傳聞卻教張繼聰變得硬淨起來，EQ提升了不少，更拍心口向謝安琪寫包單：「老婆，咪就係老來坐喺你身邊，同你分享過去幾十年經歷過所有風風雨雨嗰個人，我做老公一會好好保護佢照顧佢。」 撰文：李珮洳
張繼聰（Louis）近來出席各大小活動，必定會被問及其妻謝安琪（Kay）的負面報道，他每次都是笑笑口回應，就算是牽涉到第三者的婚變傳聞，他都是笑意盈盈的。其實Louis曾經為不實的報道不開心，有時亦不知怎去處理，他說：「初時真係唔識點去面對，點去處理呢啲事，唔開心一定有，之後諗諗吓件事越嚟越失控，嬲都冇意思，咁不如留番啖氣好過啦。」
連續劇三年未間斷
Louis形容為「連續劇」的新聞，是由06年宣佈結婚當日開始，至今兩年多來從未間斷，他說：「呢個劇足足做咗兩年幾，個opening就係宣佈結婚當日，之後就到我太太生完BB，開始有好多話佢未收身嘅報道，接住就係話我哋係窮家庭，跟住就係阿Kay事業有好成績，將我哋兩公婆比較，直到最近就係話婚變，件事牽涉埋Eason（陳奕迅）。」對於以上種種報道，Louis的感覺是失望多於不開心，更加覺得價值觀已經開始扭曲，他解釋：「我咁耐以嚟對狗仔隊都好合作，我知大家係工作需要，但我開始feel到件事失控，其實大家心目中仲有冇關懷同埋愛呢？」而在被追訪的過程中，Louis聽得最多的一句說話就是：「搵食啫！搵食啫！」
Louis衷心希望大家搵食之餘不要影響到其家人，他說：「我知大家搵食艱難，可唔可以幫我屋企人打番格仔，特別係小朋友，呢一個係我唯一嘅要求。」
傳婚變夫妻情越好
結婚兩年就傳婚變，Louis從來沒有懷疑過另一半，他更加明白事件的有趣之處，他說：「寫Eason同我太太係因為佢兩個同一間公司，而且寫佢兩個又可以牽涉好多人，當中包括我同Eason嘅太太。」多次被問到有關婚變傳聞，Louis都是採取不多說的態度，因為他由始至終對太太的信任、夫妻間的感情都沒有動搖過，他斬釘截鐵地說：「人哋咁寫我哋兩公婆嘅感情，我哋只會越嚟越好，唔會好認真去傾番呢啲新聞，有時都係當笑話咁睇完就算，兩個返到屋企傾吓偈，見到個仔喺度玩得好開心，已經好滿足，乜嘢怒火都冇晒。」事情發生之後Eason與Louis有聯絡過，他說：「Eason真係好好，主動打畀我叫我唔好放喺心，繼續做好工作。佢做呢行耐過我，面對呢啲事多過我。我太太會繼續同Eason做好朋友，我唔覺得有乜嘢問題。」Louis透露太太與Eason於節日時會以短訊互相祝賀，而他亦會以同樣形式祝賀其他女性朋友，他表示：「我想問呢個乜嘢年代呀，sms咁普通，相信好多人都會同朋友sms啦。」問到Louis有何說話想向Eason說？他表示：「Eason係一個好好嘅歌手，作為一個樂迷同監製，要感謝有佢呢位咁好嘅歌手，佢為香港樂壇做咗好多嘢，佢係一個好頂尖嘅歌手。至於大家同樣作為人哋爸爸同丈夫，我希望佢每一日生活都過得好好！」
許承諾終身愛老婆
作為丈夫，Louis看見太太受到不同的壓力、抨擊，面上掛上滿足笑容的他說：「我好想同太太講，一直希望同佢走到老，家發生嘅事係我哋將來老咗嘅話題之一，係一個回憶，老婆咪就係將來老咗坐喺我身邊嘅人囉。作為一個老公我會好好保護同照顧佢，同埋佢喺我心目中已經係一個唱得好好嘅歌手。」
Louis還自誇EQ高，他笑說：「如果10分滿分我一定有10分啦，以前我喺燥底，會拍枱嗰種，有咗老婆同囝囝之後，我知道唔可以咁樣，我嘅情緒一定會影響埋身邊人，所以呢啲新聞不停提升我嘅EQ。同埋我家學詠春，當中嘅哲學好啱我用嚟處理問題，有人同你鬥力，你同佢鬥大力一個鐘係冇意思o架，反而你退後一步，你仲有好多空間可以行、仲有好多招式去化解，所以凡事都用唔同角度去睇，個人都會開心啲。」
聰Kay回憶錄
張繼聰形容他與老婆謝安琪的負面新聞，有如一齣連續劇，還會一直「演」下去，過程中夫妻間的生活瑣事，都被外界加以批評註釋，奉子成婚、慳家夫妻、女強男弱等等。張繼聰更拿來開玩笑：「所有衰嘅稱號我兩公婆好似儲印花咁集齊o架啦，唔知可以拎去換啲乜嘢獎品呢？將來我一定可以寫回憶錄呀！」
《奉子成婚》
06年11月27日
張繼聰（箭嘴示）與好友慶祝娶老婆，那邊廂謝安琪開記招宣佈結婚，由那天起張繼聰已遭人詬病不出席記招，要老婆獨自面對傳媒追訪。
《慳家婚禮》
07年1月20日
張繼聰娶謝安琪喜氣洋洋，但背後則被批評新娘戴朱義盛，喜宴酒微菜薄，度蜜月慳皮等等，辦喜事都要背負壓力。
《辛苦媽媽》
07年6月19日
謝安琪16日誕下兒子張瞻，三日後，夫妻大方抱着BB出院。謝安琪自誕下兒子至復出期間，不斷被嘲未收身肥腫難分。
《成功背後》
09年1月1日
叱咤頒獎禮謝安琪發威掃6獎，從此成為樂壇新天后，張繼聰也從此孭起湊仔公之名，被指女強男弱，幸他能沉得住氣，努力維繫幸福家。
《一曲纏繞》
09年5月9日
媽咪天后謝安琪開紅館騷，本應可喜可賀，就是因為與陳奕迅熱情演繹歌曲，未幾即傳出婚外緋聞，直至現在連陳冠希也牽涉其中。
攝影：陳慧安
化妝：Pinky
髮型：Jobby（HairPeace）
場地提供：MarcoPoloHongkongHotel