《蘋果日報》（八月二十五日）以全版報導《讀者文摘》申請破產保護令，閱之令人感慨。《讀者文摘》上任總編輯潘少權、前任總編輯馮強，馮強之前嘅總編輯鄭健娜，都算係左丁山老友，而《讀者文摘》轉載過自己嘅文字，自己又係長期讀者，當年背誦雜誌出版嘅WordPower學英文，對呢本雜誌好有感情。講純情，講乾淨，講文字嚴謹，《讀者文摘》在中文雜誌中，無出其右。不過現實啲講，追求高質素，一定要付出金錢，而質素與高成本不可分割，辦雜誌成日講慳錢、講節儉，就唔駛講質素嘅嘞。《讀者文摘》嘅商業模式係高成本、高質素，然後要求高廣告費，此模式已被免費互聯網衝擊至支離破碎，《讀者文摘》另外嘅收入係靠直銷，有咗ebay、亞馬遜之後，讀者文摘式直銷已經玩完。
《讀者文摘》搞到要申請破產，乃泡沫時代槓桿式收購之禍。二○○七年，私募基金Ripplewood以二十八億美元買入《讀者文摘》，舉債二十二億美元，現時每年付出利息一億四千五百萬美元。現在美國公司申請「預先安排破產」（pre-arrangedbankruptcy），重組後，Ripplewood之投資蝕清光，拍拍手離場，銀行（以摩根大通為首）就同意將債務削減至五億五千萬美元，取得全部股權。銀行做呢類貸款都幾笨吓，有downside（跌），冇upside（升），如果經營成功，Ripplewood賺得最多，現在失敗了，買家損失六億美元，鬆人了之，銀行就要孭起間公司，否則血本無歸，難怪美國有人話摩根大通係「傳媒大亨」，因為向呢間銀行借錢嘅傳媒，加埋起嚟，每年營業額仲大過「時代出版」。
幾個月前沙田凱悅酒店開業之時，左丁山第一時間試新，到酒店食自助晚餐，在內碰到潘少權，佢話已經辭去《讀者文摘》老總職，當時覺得有啲突然，因為佢好鍾意呢份工嘅。昨晚又在沙田馬會撞到佢，與梁覺教授、經濟W等人。潘少話佢休息過後，即將有新搞作喎。