要搶鏡，視覺刺激永遠係第一元素，而鮮艷顏色就最易達標，好似新一代鮮黃日產Fairlady370Z就令人一見難忘。車係咁，人亦然，近排喺電視日日着住件黃色衫起飛腳嘅郭政鴻，喺電視劇入面伸張正義嘅角色，即使唔係主角都一樣搶鏡。今日郭政鴻喺370Z前大腳一踢，聚焦伎倆，手到拿來。
記者：許維雅
攝影：楊錦文
要跑得要舒適
33℃高溫，郭政鴻着住《古靈精探B》件厚身黃色風褸，埋位影大相時表現出一份老練：「功夫Pose？得，我做踢高腳動作，嗱，我一踢你就連續影，盡量捕捉最高嗰下。係咪要呢啲？咁我不停踢多幾個畀你。」娛圈浸淫多年，成熟理所當然。年輕時曾經擁有Supra、MR2及司力架等戰車，鍾意改軨改避震，更鍾意聯群結黨周圍飆，不過家嘅買車標準就有少少轉變，除咗飆得，仲要「實用」。「最重要係坐得舒適，空間要大，一定要有四座位，可以載埋屋企人。外形方面，我會鍾意流線型嘅車，家唔少四門轎跑都好靚。」試呢部新世代370Z，佢都係最欣賞車身嘅流線設計，「好靚！外形都已經搶晒，同埋座椅設計都好舒適，內櫳夠晒豪華，音響又勁，揸車時會好Enjoy。」新370Z嘅全真皮內櫳質感細緻，加埋豪華設計嘅中控台，仲有八喇叭雙Subwoofers嘅Bose音響陪你，感覺唔舒適都好難。
跑車做玩具
人會改變都係因為經歷，以往唔係辣車唔好，家有四個位先叫好，唔通年少時已經輕狂夠？「唔敢開快車喇，一來後生時炒過車，喺灣仔華潤出面炒到半邊車身爛晒，好彩執番條命，唔敢再亂嚟。二來有幾個朋友都係炒車過身。家心境唔同咗，唔係淨係諗自己，會諗埋屋企人。唔係唔想買跑車，等到有能力買第二部車，就會買嚟當玩具。好似呢架370Z，外形夠肌肉感，又有速度，價錢唔算貴，真係好吸引。」難怪佢試車後第一句就係：「好快！好正！」3.7公升V6引擎，七前速自動波箱，再配備CVTC、VVEL、DRM及ASC等系統，輸出333匹馬力，加埋有高剛性、高靈敏度行車操控，咁強勁後盾，感覺當然爽快利落。逐漸被觀眾接受嘅郭政鴻剛拍完《五味人生》，再次挑戰乸型角色，機會接踵而來，想擁有跑車當玩具呢個目標，應該唔使等好耐。
規格
引擎：3,696ccV6DOHC
馬力：333ps/7,000rpm
扭力：37.0kgm/5,200rpm
傳動：七前速自動波，後驅
售價：$553,800起
查詢：合誠汽車（28035333）
