滙豐旗下第一間喺內地成立嘅合資保險公司滙豐人壽保險，噚日正式開業，為隆重其事，除咗安排必有嘅記者會之外，仲有一場酒會，宴請合作夥伴同埋高官出席，當然唔少得平保（2318）董事長馬明哲同埋交行（3328）董事長胡懷邦，話晒滙控（005）都持有佢哋十幾巴仙股權嘛。
雖然記者冇得參加酒會，不過今次滙豐出手闊綽，送贈每位一個走馬燈擺件，仲係999純金㖭，寓意「開業誌慶，生意興隆」。
同場加映，有內地記者向管理層提問，點解內地保險公司「不花一分錢就可以賺到錢」？滙豐亞太主席鄭海泉咁就被難倒，事關內地記者先後以「上海話」同埋「北京話」問鄭主席，即刻變得雞同鴨講，結果鄭主席都冇正面回應呢條問題。