劉鎮偉這趟不再搞笑，轉而搞機。食正《變形金剛》條水拍了套《機器俠》，不扮高深唔玩精密，轉而加入中國特色機械人，識打功夫又玩雙節棍。劉鎮偉更誇下海口說：「唔會輸蝕畀外國人！」睇慣外國特技的觀眾，不妨試試土炮的滋味。
自言不太通曉用手機傳短訊、電腦的劉鎮偉，這回捨他專長的時光倒流橋段，新片《機器俠》轉玩高科技的機械人題材，他說：「我係lowtech（低科技）人，短訊都唔係好曉用，所以我都覺得今次幾精神分裂，為咗避開我嘅弱項，我會減少性能描述，轉而強調功能，我敢講好多動作反而係《變形金剛》做唔到。」
中國神話元素
當然講到機械人會打功夫、耍雙節棍，港式電影自然比西片優勝。另外，劉鎮偉表示還會加入中國神話的構思，如方力申騎的風火輪及牛魔王形的機械人，目的當然要跟《變形金剛》劃清界線，他說：「要去比較當然在所難免，不過我敢講就算唔講功夫，我哋嘅特技都唔會輸蝕畀外國人。」
劉鎮偉表示中國特技仍在起步階段，但始終要有人開始嘗試，他舉例說：「好似好耐以前如果你同人講，有中國人會喺田徑場攞金牌你未必會信，但係自從出咗個劉翔，邊個仲敢話中國人唔得。」凡事要有先行者，他不介意當白老鼠。
讚星爺有心人
此外，談到劉鎮偉自然不能不提他的好朋友周星馳，當跟星爺合作的人都離他而去的時候，劉鎮偉仍能跟星爺稱兄道弟。不能不敬佩他的忍耐力，不過劉鎮偉仍為好友說項，他說：「我覺得佢（周星馳）冇問題喎，我哋仲不時食飯傾偈，好似我最近拍《越光寶盒》佢都有打嚟問，係咪拍番之前同佢合作個套《月光寶盒》，佢個人幾有心。」
採訪：何永寧
攝影：仇志德