噚日跟住《轆Book》推介嘅醒目方法，將架日產Qashqai洗到立立令。咁勤力，都係為咗今日有美相伴遊車河，加埋狂擦、揼平骨兼睇埋日落，夠唔夠充實？半日行程節目豐富，仲要人靚車醒，加硬分！
記者：梁美甜
攝影：伍慶泉
Models：Suyen、Ray
Hea玩西北
呢個遊車河行程一口氣滿足骨精同埋為食王。由荃灣出發，先上大帽山睇靚景吹吹風，再落山腳浪漫嘆特色菜，再入元朗行街、「掃街」兼揼骨，最後係白泥日落美景。全程時間鬆動，夠Hea。
路線：荃灣→荃錦公路→大帽山→石崗→錦田公路→凹頭迴旋處→元朗→流浮山道→白泥→元朗→大欖隧道→荃灣
第一站
大帽山會「英雄」
呢個行程唔使晨咁早起身，接近中午先出車都未遲。於荃錦交滙處轉入荃錦公路上大帽山，途經川龍、大帽山郊野公園，呢個路段九曲十三彎，都可以考考技術，順便操車都幾過癮。過大欖郊野公園山頂不久，喺甲龍附近有個「英雄亭」，推介必落車一Hea，呢度係一個靚景位，天朗氣清時可以飽覽整個元朗景色。
第二站
石崗嚐Hea味
攬住談心睇靚景雖然Sweet，但都唔好Hea太耐，因為早餐加午飯嘅醫肚時間唔可以推得太遲。離開「英雄亭」，繼續沿荃錦公路落山，十多分鐘就會落到山腳，喺石崗附近，有一家已經有30年歷史嘅餐廳。遊車河揀間餐廳，有免費泊車係首要條件，呢間金壘餐廳仲Sell埋傳統及正宗泰式烹調方法，食物Keep住原味，豬手及羊鞍尤其出色。Hea味最濃要數露天茶座，感觀及口慾同時得到滿足！
金壘餐廳（24881642）
地址：新界元朗八鄉石崗上村DD114號
泊車：車場有二十多個免費車位，周末假日更有免費代客泊車
第三站
元朗揼骨買手信
食飽飽，揸車離開石崗，沿錦田公路經凹頭迴旋處直入元朗市中心，呢度仲有好多節目。元朗名物人人都知有凉粉、牛丸、老婆餅、蝦子麪等等，原來近排仲有Hit爆嘅台式美食。最正係食肆夠集中，要買要食都係行幾步就到。泊好車先周圍Hea買番啲特產，跟住嚟主打節目係去元朗勁旺嘅骨場泰舒服鬆一鬆。泊車可以揀金祥坊咪錶停車場，而西菁街則有幾個室內停車場，時租$12起。
泰舒服（24430068）
地址：元朗西裕街5-11號金福閣2號地下
泊車：門口有咪錶，又或泊於西菁街多個停車場
第四站
白泥至愛日落
元朗行街、「掃街」兼揼骨夠你花上幾粒鐘，如果開始攰，呢個遊車河之旅都可以就咁結束，但如果依然有興致，可驅車再入流浮山白泥睇埋出名嘅日落。由元朗入天水圍，經流浮山路往白泥。回程折返元朗經大欖隧道及屯門公路出荃灣，只需二十分鐘左右。Hea住玩足大半日，完全唔攰。
