一命二運三風水，在娛樂圈中篤信風水命理的大有人在，有「鬼王」稱號、擔任華懋慈善基金風水專家證人的司徒法正，自稱曾為天王藝人養鬼仔保名利雙收，但交換條件是多行善積福，又有女藝人出術嫁入豪門，真是信不信由你！
法科風水師司徒法正，是華懋慈善基金風水專家，鑽研風水命理數十載，在多年風水生涯中，他在娛樂圈中遇過不少有緣人，他曾為一些藝人擺陣趨吉避凶，因為娛樂圈屬偏門行業，既要名又要利，最緊要是旺人緣，司徒法正認為催人緣運，可從傳統求神助增強運氣，但也可養鬼仔。
承諾要多做善事
司徒法正承認有圈中人為保名利而養鬼仔，他說：「有老一輩天王係有咁做，所以佢哋到今時今日都有不停做善事，家有乜善事，佢哋一定第一個行出嚟做，有幾個特別出名嘅藝人都係咁，不過佢哋有承諾要多做善事，直到家佢哋都做得到，佢哋有影視界天王，又有天王歌手。」
司徒法正自稱曾為一位希望嫁入豪門的女藝人作法，他說：「我採用王道和合法，其實有王道又有霸道，王道係增加緣份，令兩個人能夠感情深厚，不過都要靠自己嘅推動力，霸道係借用鬼神力量，但係唔會長久，而且男方係有地位嘅人，佢嘅運氣好高，用霸道會出事。」他表示最終這位女藝人已成功嫁入豪門，夢想成真，問到其現況，司徒法正說：「佢梗係好啦，都生咗小朋友。」對於風水佬呃你十年八年這話，他覺得世事無絕對，有很多事是靠本身命運及孽障多少，好似種生基或風水遺囑，並非擺陣便一定成功，他笑說：「幫到你就神仙，幫唔到你就神棍。」
另外，有線節目《怪談》搬上大銀幕，由司徒法正和陳曉華合演驕陽電影製作的同名電影，早前拉隊赴東南亞取景，此片以紀錄片形式拍攝，有一場面是陳曉華到藏屍洞撕開陳年屍布。
陳曉華撲屍狂嘔
陳曉華說：「撕開屍布後我要對住死屍吐一口陽氣，點知我企唔穩，跌咗落條屍度，啲工作人員即刻拉返我上嚟，我之後狂嘔，睇醫生話細菌入腸，可能吸咗啲屍塵。」陳曉華自言主持《怪談》後，經常半夜驚醒。
採訪：陳寶明 攝影：陳俊強
