金管局總裁任志剛仲有一個月就退休，臨別依依，日前先同財記茶聚，訴說往事，噚日再喺逢星期四出街嘅《觀點》專欄內，細說同現任國家開發銀行董事長陳元嘅一段情誼，自爆「一國兩制」背後鮮為人知嘅小片段。
上京「獻醜」努力學刨冬瓜
追溯至廿年前，當時仲係人行副行長嘅陳元，邀請任總到北京進行首次公事訪問，任總話當時講嘅普通話十分「不濟」，講真，嗰個年代，香港人講普通話多數都唔係太正，內地人會笑我哋係「刨冬瓜」。當日嘅任總亦要靠傳譯員溝通，最後令任總「的」起心肝學好普通話，塑造今時今日講得一口流利伶俐普通話嘅任總；不過呢個唔係重點，最緊要係呢一次訪問，促進中港兩地貨幣當局為建立緊密工作關係，邁出第一步。
20年前，當時香港仲係英國殖民地，加上政治過渡中，中港合作講兩地聯繫絕不尋常，中央就曾經被指摘干涉97前香港事務，英國又被人質疑撤出之前掏空香港。當時有人鬧任總係殖民地主義者、叛徒，令佢為之氣結。好彩最終苦盡甘來，97前嘅10年期間，中英雙方喺香港貨幣金融事務進行緊密合作，貨幣金融體系亦推行咗策略性改革。
任總話退休之後，希望趁住記性仲唔錯，寫多啲關於本港貨幣金融事務嘅重要歷史，同大家分享。唔知下次任總會唔會自爆在任期間嘅恩怨情仇呢？