花旗國Amazon嘅電子閱讀器Kindle越嚟越普及，身在台灣訪問嘅中移動（941）董事長王建宙諗住搞個「國產版」，噚日佢就同台達電子傾點樣開發，對方即時展示全台最大嘅全彩電子紙，王總力讚效果頂呱呱，豪揮「感謝」二字，仲參觀埋設備，逗留咗一粒鐘。台達電本身係中移動通訊設備電源最大供應商，供貨比重超過三成。
王總旋風式訪台，除咗要促成入股遠傳電信呢頭婚事，仲同台積電董事長張忠謀、聯發科董事長蔡明介等台灣IT大佬逐一密斟，富士康（2038）母公司鴻海集團董事長郭台銘亦唔怠慢，星期日先同王建宙見面，周二邀請王總到鴻海旗下嘅奇美通訊參觀，據講除咗路口管制，並無懸掛任何歡迎標語，原來郭董希望低調同中移動傾成直接提供TD-SCDMA手機呢筆大生意。