近排警方西九龍CID總區可以話係多事之秋，西洋菜街鏹水彈案未破、旺角差館強姦案醜聞，仲有泰龍被殺腥風血雨手尾長，單單都係棘手大案，最新一單涉及自己人「家事」，仲難審。有自稱西九CID向八方報料，指「西九CID一哥」西九龍總區刑事總部高級警司梁家明為一名即將退休嘅警署警長搞歡送會，本來呢啲畀面派對講心嘅啫，但呢位CID話，去食呢餐飯唔簡單。
軍裝行咇冇份食
據講即將榮休警長係梁家明愛將，可能梁Sir想搞得熱鬧啲，就「通知」麾下所有警長級以上CID都要出席今晚飯局，食呢餐飯已經要AA制，報料探員仲話如果人人聽話捧場，一旦今晚發生大鑊嘢，西九隨時陷入「冇警時份」，甚至好似海關動用緝毒犬影相咁「冇警用」。
CID有飯局啫，仲有軍裝行咇，唔會「冇警用」啩！八方向西九環頭老友打聽究竟發生乜事，佢斬釘截鐵話有人放流料。據佢講，今晚喺旺角警察遊樂會的確係有個晚宴活動，主辦單位係旺角警區CID，並非梁家明睇嘅西九CID總部，舉辦目的係慶祝旺角環頭贏咗西九總區最佳CID殊榮，歡迎西九環頭所有CID參加，但都要落更後或放假先有份，所以絕對唔會影響執勤。
呢位知情人士又好抵死咁話，如果今晚西九真係有大鑊嘢，真係無有怕，事關大把夥計可以迅速增援，空群而出做嘢咁話。話就咁話啦，不過梁家明今年底榮休，何解臨尾俾人屈呢？呢位「西九CID一哥」近期不時曝光，旺角擲鏹水彈、援交少女碎屍案等都係佢負責，之前查過一樓一連環兇殺案、東亞銀行保險箱400萬元失竊案等，警隊中人稱，梁家明向來人緣唔錯，忽然惹是非可能同鐵面無私作風有關。
原來梁家明除咗要偵查棘手案件，仲要處理內部調查，一旦發現有夥計違規，都係由佢處理，尤其係發生旺角警署強姦案後，佢老哥更加雷厲風行，整頓紀律絕不手軟，八方聽聞有唔少夥計覺得好大壓力，知情者稱唔排除今次係有人趁機作反，想向梁家明還以顏色。
mailto:[email protected]