名醫方心讓病逝，各方紛紛致哀，天主教陳日君樞機以另類方式懷念故人，透露自己同方醫生嘅最後交往。
方醫生病後入住復康院，為安心養病，謝絕外人探訪，陳日君話佢忍唔住要見老朋友一面，所以決定濫用自己當時身為主教呢個身份嘅特權，逕自去復康院探病，佢以為偷偷入去冇人發覺，點知都係事敗，因為佢抵達時正好碰見方家上下去探望方醫生。
方家當然無拒人千里，陳日君話見證方家一家人家庭團聚，感到好感動，而佢自己亦係方醫生嘅受惠者，佢所屬嘅慈幼會好多神父、修士都曾得到方醫生照顧，對於方心讓出錢出力幫助國內病人，陳日君話真係十分值得尊敬。