廣播W在老飯店請食午飯，介紹新書《一起廣播的日子．香港電台八十年》，此書由陳雲撰寫，香港電台提供資料，應該有睇頭，陳雲在專欄常以「貧道」自稱，仲以為佢係道長㖭，原來唔係，佢在中文大學新亞書院英文系畢業，到德國讀哲學、民俗學，攞博士學位，但唔知點解，對中國歷史、宗教、古老習俗非常有研究，唔到你唔服。佢寫嘅「中文解毒」，已成暢銷書，小YY揸住嚟讀，津津有味，估唔到一本咁冇「潮氣」嘅書，竟會吸引到小YY呢類年青人。
講起潮人、潮氣、潮語，在座嘅靚女C問左丁山：「知唔知升呢點解？」唔識噃，靚女C咭咭笑：「你out嘞！」out吖嗱，左丁山都唔知幾in，立即拎出部iPhone，按「潮得起」，立即睇到「升呢」呢個詞，解曰：「升級的意思，源自角色扮演的電子遊戲，英文意思係Toascendtoahigherlevel。」想來升呢就係升一個level嘅簡稱。靚女C見左丁山居然有「iPhone潮得起」字彙，不禁讚嘆一句：「你又幾潮爆喎！」
呢啲流行字，會令陳雲睇到眼寃，唔知點樣去解除語癌之毒。我哋識講「寡人有疾，寡人好色」呢班人，與年青人溝通，不知如何說起。靚女C話佢哋公司做一個project，成班年青行政人員，平均年齡三十歲，諗計如何向二十歲以下嘅消費者推銷，諗嚟諗去，發覺一切「媒體計劃」（mediaplan），可能都係紙上談兵，卒之有人提議搵一班十二至十七歲嘅學生做focusgroup，請少年人發表意見。發現呢班人唔睇電視，唔聽收音機，唔睇電腦雜誌或任何雜誌，當然亦唔睇報紙，只係鍾意睇YouTube，上網打機（on-linegame），一切溝通與獲取資訊，全部在互聯網進行。所以靚女C話：「甚麼傳統媒體都話要年輕化，多餘啦，傳統媒體根本冇晒年輕讀者，聽眾或觀眾！」話雖如此，電台有八十歲咯，如何繼續下去，吸引聽眾聽多另一個八十年呢？唔通自動放棄咩，點都要繼續下去o架！廣播W知道此係一個大挑戰，要諗方法吸引少年人升呢至得，但香港電台前途未卜，真係難為咗佢。