新世界純官硬撼立法會單司法覆核官司未有判決，立法會方面已開始埋單計數，由於長毛拒絕由立法會聘用嘅英國御用大狀代表，自行聘請李柱銘出庭答辯，立法會秘書處近日聯絡議員，提出開會同長毛講數如何分擔訟費，據知保皇黨認為長毛懶巴閉用「私家」大狀，應該自己找數，唔好使阿公錢。
然而長毛反駁佢因公職與訟，議員應該有權決定如何應付訴訟，案中佢冇個人好處，所以不論輸贏，立法會都應該支付其訟費，保皇黨搞咁多小動作無非想玩佢。立法會行管會原訂今日開會講數，有人話既然單案未判，未知法官如何判與訟雙方承擔訟費，唔使咁急講數，所以突然又取消會議。