亞洲撲克巡迴賽噚日喺澳門新葡京酒店舉行，到場參賽嘅藝人包括陳自瑤（YoYo）、莊思敏、o靚模裴殷（A.Lin）同埋盧頌之（DaDa），佢哋同幾位賭場高層一齊比賽。
着上低V裝嘅YoYo酥胸半露，搶晒A.Lin同DaDa嘅風頭。原來噚日係YoYo生日，不過佢唔肯透露幾多歲，佢話男朋友王浩信已同佢慶祝咗，仲送上一個好可愛嘅蛋糕同禮物，仲演奏咗一曲畀佢聽，唔怪得佢一路講一路甜絲絲咁笑啦。
莊思敏讓賽
莊思敏就話之前經常會同朋友去澳門玩，最高峯時一星期會去三至四次，佢話知道YoYo生日，一定會讓賽。另外，A.Lin就話唔介意男朋友賭錢，只要唔好日日賭同過份沉迷就得啦，佢仲試過用500蚊贏咗4,000幾蚊，嗰次令佢覺得好有滿足感。DaDa就認為賭博都係娛樂嘅一種，但一定要有節制，千萬唔可以沉迷，佢有一次輸咗200幾蚊就收手唔玩啦。
