金管局任總退休在即，全城關注其動向，官場中人都唔信任總輕易「裸退」，私下議論紛紛任總日後有乜高就，八方同一個高官傾開呢個話題，佢話既然任總有心有力，講到明想貢獻國家，擺在面前就有一份優差啱佢做。
八方話任總位極人臣，是但安插個虛銜閒職過佢，好屈就吓啫，高官話梗係唔係啦，佢轉入正題，好認真咁講，既然香港人一聽「幹部治港」就驚到震，要移民咁誇張，又唔鍾意「公子治港」，擔心官商勾結，咁就不如考慮吓任總治港啦。
能力高政治手腕一流
任總公務員出身，係財金專家，政治手腕一流，能力毋庸置疑，高官一輪嘴讚佢，最重要係阿爺信得過任總，港人亦對任總好有信心，過去十幾年聯滙紋風不動，個市有乜風吹草動，市民只要見到個白頭就安樂，確係信心嘅標誌。
首富話下任特首兩大條件係信任同勝任，環顧三個有意落場跑馬仔人士，邊個兩者兼得？反而任總就合晒條件，高官又話假如任總出嚟run，最閉翳嘅應該係攞命陳，事關兜咁大個圈，隨時又做番阿二。