佐丹奴(709)今年首季同「戲王之王」詹瑞文合辦嘅「CheerUUp」T恤系列,都算幾成功,主席兼行政總裁劉國權話,香港市場有rap歌rap到風生水起嘅農夫Crossover,內地就破天荒搵韓國電視明星做代言人,下星期會推出廣告,趁市道回暖加強宣傳攻勢。
之不過,公司上半年業績令人跌晒眼鏡,劉主席似乎冇早幾年咁趾高氣昂,噚日喺記者會全程都愁眉深鎖。
佢好感慨咁話,03年沙士時業主都肯減租共度時艱,但舊年底金融海嘯,今年初又流感肆虐,但租金呢兩年依然企得好硬,家更加冇乜下調空間,事關港股已飆上兩萬點,九龍站「君臨天下」要萬八蚊一呎,佢預告公司全年營業額按年有得升,但利潤未必配合到咁話。咁就睇吓農夫可唔可以幫佐丹奴風生水起啦。