繼《巾幗梟雄》中正義無私的四奶奶大受歡迎後，鄧萃雯近日在內地劇《牌坊下的女人》中化身成自私自利的寡婦，角色有點像她在《金枝慾孽》演的如妃，同樣大收旺場，令雯女喜出望外。
鄧萃雯與吳奇隆前妻馬雅舒去年在橫店拍攝的內地劇《牌坊下的女人》，早前在廣東、南京、重慶和武漢等地播出時，先後成為當地收視冠軍，叫雯女大感鼓舞，她說：「其實今次角色同《巾幗梟雄》裏面好光明磊落、好無私嘅四奶奶係啱啱相反，我飾演嘅何其貞係好黑暗、好自私，個劇本寫得好好，再加上一班好有heart嘅演員，先至會咁成功。」雯女希望該劇有機會在香港播出，讓香港觀眾也能欣賞得到。
與大伯有姦情
《牌》劇改編自台灣金鐘獎最佳劇集《貞女、烈女、豪放女》，講述大家族在封建社會中因為貞節牌坊而引發的明爭暗鬥故事，劇中雯女結婚不久便成為寡婦，其大伯、即是劇中的佟老爺一方面要雯女守貞節牌坊，但另方面二人卻有姦情。
其後雯女被人污辱後懷了身孕，為掙扎求存，雯女於是欺騙佟老爺說懷了他的骨肉，故事道盡人性自私自利一面，也跟早年雯女在《金枝慾孽》所演的如妃有點近似，她說：「係有少少似，製作單位都係睇完《金枝慾孽》之後搵我做，本來部劇開拍時同《巾幗梟雄》撞咗期，但佢哋都肯等埋我，令我覺得好感動。」
雯女因與馬雅舒合作《牌》劇而變得熟絡，有指馬雅舒與吳奇隆的婚姻去年已出現問題，問雯女拍攝期間可察覺對方悶悶不樂時，她說：「唔覺佢唔開心，佢仲成日喺我面前讚佢老公點好點好，又叫我去北京時記住探佢哋。我就同佢講笑，叫佢下次嚟香港時我約埋蔡少芬（吳奇隆前女友）一齊出嚟飲茶㖭，所以我睇到佢哋婚變消息都好愕然。」
續撐正生學生
此外，雯女月前曾到正生書院探訪，對於正生書院所屬的正生會近日被指賬目不清，又被廉政公署調查，雯女表示也有留意說：「行政上嘅事我唔清楚，但我睇到佢哋真係好刻苦耐勞、好用心去教導班學生，帶佢哋走入正途，唔可以抹煞佢哋對班學生真係好好。」
雯女認為要學生成績好不是難事，但學生回到正途卻很艱鉅，她說：「我覺得正生書院校長同老師培訓學生嘅理念好好，如果佢哋咁易賺錢，點解仲要行一條咁艱苦嘅路去教班學生，所以我覺得係兩件事唔應該混為一談。」
採訪：林妃