郭政鴻去年在《古靈精探》中猶如李小龍上身的演出，令觀眾留下深刻印象，無綫在續集《古靈精探B》中遂加重鴻仔戲份。對於劇中模仿偶像李小龍演出，鴻仔形容對方是神，任何人根本難以仿效，但為不想影響偶像威名，惟有盡力做好，並希望藉劇集讓更多人認識李小龍所創的截拳道。
郭政鴻10歲已開始習武，且向來十分崇拜李小龍，適逢日前鑽石山荷里活廣場舉行李小龍珍藏展，鴻仔便前往參觀緬懷偶像一番，更大擺李小龍的格鬥甫士。
當偶像係神
鴻仔表示去年接拍第一輯的《古靈精探》時，他已做了不少有關李小龍的資料搜集，鴻仔說：「我本身都好鍾意李小龍，佢除咗係一個武術家之外，仲係一個思想家，佢嘅格鬥係用最直接方法去解決自己眼前嘅危機，佢嘅自信同個人魅力係好神奇。我都好希望可以透過呢套劇去表達到佢所創嘅截拳道嘅功夫出嚟。」
有機會繼續模仿李小龍，鴻仔揚言十分欣慰，但同時也感到壓力及難度，他說：「佢就好似神咁，根本冇人能夠扮到佢，所以我唔會太刻意去扮，我只係希望可以透過某啲演繹去表達，因為真係好難去做到佢震撼嘅動作、表情同聲線。」
最愛黃戰衣
鴻仔對李小龍多套電影中的造型均十分欣賞，特別對於電影《死亡遊戲》中的一套黃色戰衣最為鍾情，他說：「因為真係好經典，而且佢着上身可以欣賞到佢身上嘅肌肉，只有佢先可以着得好睇。」
採訪：王崇穎
攝影：陳俊強
鳴謝：李小龍會
