股票M大概因為股市從一萬一千點反彈到二萬一千點，客戶交易大增，佣金賺得唔少，除咗向鑽石L查詢鑽石行情，想話買番一粒老婆之外，仲想買樓，話作長線投資喎。佢人面甚廣，樓盤未推出啫，就探到河內道新樓會賣萬六至二萬蚊一呎，預備叫代理入貨，誰知到咗接近推出期，人地話要兩萬銀一呎以上先至有交易，股票M即時打退堂鼓，一於唔制。
股票M自然有佢嘅理由。左丁山用簡單計數機計畀佢睇，一個八百呎單位要千六萬元，拎五百萬出嚟，供千一萬元，當兩厘息，年期二十年，月供近五萬六千元，租出去，收到幾多租？要每呎月租七十五元，先至收到六萬元，食人隻車咩，邊個肯付租金六萬嚟租一層八百呎樓，實用面積未夠六百呎呀，租國金二期嘅寫字樓呀？股票M話：「唔駛你左丁山㩒計數機，我都識得心算啦，諗落博唔過，畢竟現在係金融海嘯之後，啲人使錢唔會再好似以前咁豪爽。肯出六萬銀租八百呎？」
買樓嚟炒，唔須要計數，膽博膽便是，股票M在股市打滾多年，始終認為炒股容易甩手止蝕，炒樓冇咁方便，留番畀啲炒樓專家以及心口寫個勇字嘅師奶兵團去炒個夠。香港人打完算盤話樓價高，風險高，外來大款就完全唔同想法。有上海大款在金鐘五星酒店頂樓請食午餐，飲紅酒，食鵝肝連埋頭盤、湯、主菜、甜品，每人盛惠三千，大款話食得幾過癮吖，從頂樓望過去九龍，西九樓盤，尖西尖東盡在眼簾，一眼睇中河內道高樓，問吓香港隨扈：「價錢如何？」隨扈答：「聽講係兩萬蚊一呎，或每平米售二十二萬港幣。」大款哼一聲：「這麼便宜，可以買十個單位玩玩。」同枱香港阿燦立即齊聲叫好，推波助瀾。祖國有這麼多有錢人，駕臨香港，好似苻堅率領前秦大軍過江攻打東晉咁，投鞭足以斷流，佢地人人掉?錢落維港，可以塞住維港水流。有佢地買香港樓，港燦退避三舍可也！