美國總統奧巴馬力撐伯南克，前晚提名阿伯連任聯儲局主席，想佢「再坐一會」，點知噚日俾人踩場贈興。摩根士丹利亞洲主席羅奇唱對台戲，公開反對伯南克連任聯儲局主席，仲話：「奧巴馬提名伯南克係個錯誤。」
引致海嘯責無旁貸
羅奇老實不客氣話：「伯南克唔係個好選擇。」佢解釋，雖然伯南克喺雷曼倒閉事件後無疑做得好出色，但佢喺引致金融海嘯爆發呢件事上責無旁貸，即使佢唔係始作俑者之一，亦都要負上擔任「建築師」角色，有份為危機創造某啲條件，所以奧巴馬絕對冇理由要對犯錯者有所嘉獎。
羅奇認為，聯儲局主席嘅人選應該具備獨立能力，要好似前主席沃爾克（PaulVolcker）咁有勇氣；佢仲話花旗國擁有一個非常健全嘅體制，絕對冇話冇咗邊個唔得。咁講即係間接話伯南克冇主見同懦弱啫，雖然伯南克咁樣俾羅奇踩到上心口，但以佢嘅讀書人性格，相信都唔會點反擊。
不過，無論伯南克係咪連任，佢都可以喺聯儲局歷史上名留青史，話晒佢提高咗聯儲局嘅透明度，仲係首個親身上電視向公眾講解政策嘅聯儲局主席。
李華華
mailto:[email protected]