呢期政圈大紅人梁振英，近日為參選特首造勢，除一反常態頻頻出席公開活動博曝光外，最新花臣係強烈否認自己中共黨員身份，近日更「逢共必反」，有人指佢係中共黨員即高分貝反駁。
梁振英噚日喺網誌大反擊，回應李怡〈蘋論〉同《信報》報道李鵬飛直指佢係黨員嘅言論，否認自己係黨員，又接受商台訪問公開「反共」。梁振英不諱言中共黨員呢個標籤，無論地面或地下，都係「負面」、「有打擊性」、「好恐怖」，對有意參選特首嘅人，被標籤為中共黨員、內地幹部，對選情都會有影響。
八方以為做黨員係好光榮嘅事，原來梁振英咁反感，佢噚日聲言冇受北京高人指點去馬，稍後會搵指佢係「幹部」嘅田少傾傾，相信唔係上門尋仇啩。